މާފުށީ ޖަލުގެ ގައިދީން އުފައްދާ ތަކެތި އާންމުކޮށް ވިއްކުމަށްޓަކައި، އެތަނުގައި ދާދި ފަހުން ހުޅުވި "ސަގާފީ ގޯތި" ހުޅުވާލަން ނިންމައިފި އެވެ.
މިކަމާ ގުޅޭ ގޮތުން މޯލްޑިވްސް ކަރެކްޝަނަލް ސާވިސް އިން ބުނެފައި ވަނީ މިހާރު ކުރިއަށް ދަނީ "ސަގާފީ ގޯތި" ގެ މަސައްކަތްތަކަށް އެތަނުގައި މަސައްކަތް ކުރާ މުވައްޒަފުން ތަމްރީނު ކުރުން ކަމަށެވެ. އެހެންވެ ތަމްރީނުތަކަށް ފަހު ގައިދީންނަށް ވެސް ތަމްރީނު ފޯރުކޮށްދީ އެ މީހުން އުފައްފާ ތަކެތި ވިއްކަން "ސަގާފީ ގޯތި" އާންމުކޮށް ހުޅުވައިލާނެ އެވެ.
ނަމަވެސް އެތަން އާންމުކޮށް ހުޅުވައިލާނެ އިރެއް އަދި ނުނިންމަ އެވެ.
ކަރެކްޝަންސް އިން ބުނެފައި ވަނީ ގައިދީން އުފައްދާ ތަކެތި ވިއްކައިގެން ލިބޭ ފައިސާ އިން ކޮންމެވެސް ޕަސެންޓެއް އާމްދަނީއެއްގެ ގޮތުގައި ގައިދީންނަށް ލިބޭނެ ކަމަށެވެ.
މިދިޔަ މަހުގެ 29 ގައި "ސަގާފީ ގޯތި" ހުޅުވައި ދެއްވީ ފަސްޓްލޭޑީ ސާޖިދާ މުހައްމަދާއި ހޯމް މިނިސްޓަރު އަލީ އިހުސާނެވެ.
އެ ދުވަހު މިނިސްޓަރު ވިދާޅުވި ގޮތުގައި ގައިދީން ޖަލުގައި ހޭދަކުރާ ދުވަސްތަކުގައި މަސައްކަތްތައް ދަސްކުރާ ކޮންމެ ދުވަހާ އެކީ އެކީ އެ މީހުންގެ ހުކުމަށް ލުއިތަކެއް ލިބޭނެ އެވެ.