ވިއެޓްނާމަށް އެރި ބާރުގަދަ ތޫފާނުގައި 59 މީހުން މަރުވެފައިވާ ކަމަށް އޮފިޝަލުން ބުނެފި އެވެ.
ތޫފާން ޔަގީ މި އަހަރު އޭޝިއާއަށް އައި އެންމެ ބާރުގަދަ ތޫފާން ކަމަށްވާއިރު، މި ތޫފާނުގެ އަސަރު އުތުރު ވިއެޓްނާމާއި ފިލިޕީންސް އަދި ޗައިނާގެ ހައިނާންއަށް ވެސް ކޮށްފައިވެ އެވެ.
ވިއެޓްނާމްގެ މީޑިއާ ރިޕޯޓުތައް ބުނާގޮތުން މި ތޫފާނުގައި އެގައުމުން 59 މީހަކު މަރުވެ 100 އަށް ވުރެ ގިނަ މީހުންނަށް ވަނީ އެކިވަރުގެ އަނިޔާތައް ލިބިފަ އެވެ. މީގެތެރެއިން 44 މީހަކު މަރުވެފައިވަނީ ތޫފާނުގެ ސަބަބުން ބިންގަނޑު ކަނޑައިގެން ދިޔުމާ ގުޅިގެން ކަމަށް ރިޕޯޓުތައް ބުނެ އެވެ.
ތޫފާނުގެ ސަބަބުން ވިއެޓްނާމްގެ 50،000 މީހުން ރައްކާތެރި ހިސާބުތަކަށް ގެންގޮސްފައިވާއިރު، ގެއިން ބޭރަށް ނުނިކުމެ ތިބެން ކަމާބެހޭ އިދާރާތަކުން ވަނީ އަންގާފަ އެވެ. އަދި ވިއެޓްނާމްގެ 12 ޕްރޮވިންސެއްގައި ސްކޫލްތައް ވެސް ވަގުތީ ގޮތުން ވަނީ ބަންދުކޮށްފަ އެވެ.
ވިއެޓްނާމަށް ތޫފާން އެރުމުގެ ކުރިން ޗައިނާގެ ހައިނާން އައިލޭންޑްސް އަދި ފިލިޕީންސަށް ވަނީ ތޫފާނުގެ ސަބަބުން ބޮޑެތި ގެއްލުންތަކެއް ލިބިފަ އެވެ. އެގޮތުން ތޫފާނުގެ ސަބަބުން ފިލިޕީންސް އިން 24 މީހަކު މަރުވިއިރު، ތޫފާނުގެ ސަބަބުން ހައިނާންގެ 830،000 ގެއަކުން ކަރަންޓު ކެނޑި، 400،000 މީހުން ރައްކާތެރި ހިސާބުތަކަށް ވަނީ ގެންގޮސްފަ އެވެ.