ދައުލަތުގެ އާމްދަނީ އިތުރުވި ނަމަވެސް ރާއްޖޭގެ ރިޒާވް ދަށަށްދާ މައްސަލަ އަކީ ޔުނިވަސިޓީތަކުގައި ދިރާސާ ކުރަން ޖެހޭ ކަމެއް ކަމަށް އެމްޑީޕީގެ ޕާލިމަންޓަރީ ގްރޫޕްގެ ލީޑަރު އަދި ހިތަދޫ ދެކުނު ދާއިރާގެ މެންބަރު އިބްރާހީމް ނާޒިލު ވިދާޅުވެއްޖެ އެވެ.
އެމްޑީޕީން ބޭއްވި "ހަވަރު ބެރު" ގައި އޭނަ ވިދާޅުވީ ދައުލަތުގެ އާމްދަނީ ވީ އިތުރުވާ އިރު، ޑޮލަރުން ލިބޭ އާމްދަނީ ވެސް ވަނީ އިތުރު ކަމަށެވެ.
"[އެކަމަކު] ހަރަދު ކުރަން ޖެހޭ އަދަދު ވީ ކުޑަ، ނަމަވެސް ރިޒާވް ދިޔައީ ދަށަށް،" ނާޒިލު ވިދާޅުވި އެވެ. "މިއީ ނިވަސިޓީތަކުގައި ދިރާސާކުރަން ޖެހޭ ކަލަހަ ކޭސްއެއް. ދުނިޔޭގެ އެއްވެސް އިގުތިސާދެއްގަ ތަޖުރިބާކުރެވިފައި އޮތްކަ މެއް ނޫން މިއީ."
ދައުލަތުގެ އާމްދަނީ ވީ އިތުރު، ޑޮލަރުން ލިބޭ އާމްދަނީ ވީ އިތުރު. ހަރަދުކުރަންޖެހޭ އަދަދު ވީ ކުޑަ، ނަމަވެސް ރިޒާވް ދިޔައީ ދަށަށް. މިއީ ޔުނިވަރސިޓީތަކުގައި ދިރާސާކުރަން ޖެހޭ ކަލަހަ ކޭސްއެއް. ދުނިޔޭގެ އެއްވެސް އިގްތިސާދެއްގަ ތަޖުރިބާކުރެވިފައި އޮތްކަމެއް ނޫން މިއީ!
– ޕީޖީ ލީޑަރ… pic.twitter.com/ov7k9KDnod
— MDP Secretariat (@MDPSecretariat) September 9, 2024
މި ސަރުކާރު އައި ފަހުން ރާއްޖޭގެ އިގުތިސާދު ވަރަށް ބޮޑަށް ދަށްވެ، ރިޒާވް ވެސް ދަށްވަމުންދާކަމުގެ ކަންބޮޑުވުންތައް އިދިކޮޅު ފަރާތްތަކުން އަންނަނީ ތަކުރާރުކޮށް ފާޅު ކުރަމުންނެވެ. ނަމަވެސް ސަރުކާރުން ބުނަމުން އަންނަނީ ރާއްޖޭގެ އިގުތިސާދީ ހާލަތު އަންނަނީ ވަރަށް ބޮޑަށް ރަނގަޅުވަމުން ކަމަށެވެ. އަދި މިއީ ސަރުކާރުން އަޅަމުން އަންނަ ރަނގަޅު ފިޔަވަޅުތަކާ ހެދި ކަމަށް ސަރުކާރުގެ މިނިސްޓަރުންނާއި ކުންފުނިތަކުގެ ވެރިންގެ އިތުރުން ސީދާ ރައީސް ޑރ. މުހައްމަދު މުއިއްޒު ވެސް ގެންދަވަނީ ވިދާޅުވަމުންނެވެ.
މޯލްޑިވްސް މަނިޓަރީ އޮތޯރިޓީ (އެމްއެމްއޭ) ގެ އެންމެ ފަހުގެ ތަފާސްހިސާބުތައް ދައްކާ ގޮތުން ބޭނުން ކުރެވޭ ރިޒާވް 61 މިލިއަން ޑޮލަރަށް މިހާރު އިތުރުވެފައިވެ އެވެ. އަދި އަހަރުގެ ފުރަތަމަ ހަތް މަސް ދުވަހުގެ ތެރޭގައި ޖުމްލަ ރިޒާވުގައި ހުރީ 395 މިލިޔަން ޑޮލަރު ކަމަށާއި ނަމަވެސް މިހާރު އެ އަދަދު މިދިޔަ މަސް ނިމުނުއިރު 444 މިލިޔަން ޑޮލަރަށް އިތުރުވެފައިވާ ކަމަށް ވެސް މަރުކަޒީ ބޭންކުން ބުނެފައިވެ އެވެ.