މައްޗަންގޮޅީގައި ހަދަމުން ދިޔަ އިމާރާތެއްގެ މަތިން ގެއެއްގެ ފުރާޅު މައްޗަށް ދަގަނޑު ހޮޅިއެއް ވެއްޓި އެ ގޭގެ ފުރާޅާއި ސީލިން ފޫއަޅާލައި ގެއްލުންތަކެއް ވެއްޖެ އެވެ.
މާލެ ސިޓީ ކައުންސިލުން ބުނީ މއ. ބުލޫ ފީޗާ ޢިމާރާތުގެ 7 ވަނަ ބުރިން ދަގަނޑު ހޮޅިއެއް ވެއްޓުނީ ބާބީ ގޭގެ ފުރާޅު މައްޗަށް ކަމަށެވެ. އިއްޔެގެ އެ ހާދިސާއާ ގުޅިގެން މޭޔަރު އާދަމް އާޒިމް އެ ގޭގެ މީހުންގެ ހާލަތު ބެއްލެވުމަށް ވެސް ވަޑައިގެންނެވި އެވެ.
އެނގިފައިވާ ގޮތުގައި ހާދިސާގައި މީހަކަށް އެއްވެސް ގެއްލުމެއް ނުވެ އެވެ.
މާލޭގައި ހަދަމުންދާ އުސް އިމާރާތްތަކުގެ މަތިން އެއްޗެހި ވެއްޓި ތަފާތު ނުރައްކާތެރި ހާދިސާތައް މީގެ ކުރިން ވެސް ހިނގައި، ބައެއް މީސްމީހުންނަށް ބޮޑެތި ގެއްލުންތައްވެފައިވެ އެވެ. އަދި މިފަދަ ހާދިސާގައި ބައެއް މީހުންގެ ފުރާނަ ވެސް ގެއްލިފައިވެ އެވެ.