އިންޑިއާގެ ބޮޑުވަޒީރު ނަރެންދްރަ މޯދީއަށް މަލާމާތްކޮށް ޓްވީޓު ކުރި މައްސަލައިގައި ސަސްޕެންޑްކުރި ޔޫތް މިނިސްޓްރީގެ ޑެޕިއުޓީ މިނިސްޓަރު މަރިޔަމް ޝިއުނާ އަދި މަލްޝާ ޝަރީފް މަގާމުން އިސްތިއުފާ ދެއްވައިފިއެވެ.
ޔޫތް މިނިސްޓްރީގެ ދެ ޑެޕިއުޓީ މިނިސްޓަރުން ކަމަށްވާ ޝިއުނާ އަދި މަލްޝާ ސަސްޕެންޑް ކޮށްފައިވަނީ ޖެނުއަރީ 7 ވަނަ ދުވަހުއެވެ.
ޝިއުނާ އަދި މަލްޝާ މަގާމުން އިސްތިއުފާ ދެއްވިއިރު، އިސްތިއުފާ ދެއްވި ވަކި ސަބަބެއް ހާމަކޮށްފައެއް ނުވެއެވެ. މި ދެބޭފުޅުން ސަސްޕެންޑް ކޮށްފައިތިބި ނަމަވެސް މުސާރަ ލިބެމުންދިޔަ ކަމަށް މައުލޫމާތު ލިބެއެވެ.
ރައީސް ޑރ. މުހައްމަދު މުއިއްޒުގެ ވެރިކަމުގެ ކުރީކޮޅު މި ދެބޭފުޅުން ހިމެނޭހެން ސަރުކާރުގެ ސިޔާސީ މަގާމުތަކުގައި ތިބި ބައެއް ބޭފުޅުން އިންޑިއާގެ ވެރިންނަށް ފުރައްސާރަކޮށް ޓްވީޓް ކުރި މައްސަލަ ވަރަށް ބޮޑަށް ހޫނުވިއެވެ. އަދި މިކަމުގައި ދެ ގައުމުގެ ގުޅުން ވަރަށް ބޮޑަށް ހީނަރުވެސް ވިއެވެ.