މިދިޔަ އަހަރު ބޭއްވި ރިޔާސީ އިންތިހާބުގެ ދެވަނަ ބުރުގެ ވޯޓުލުން ކުރިއަށް ދަނިކޮށް މަރަދޫ ދާއިރާގެ ކުރީގެ މެންބަރު އިބްރާހިމް ޝަރީފަށް ހަމަލާދިން މައްސަލައިގައި ދައުވާކުރި މީހާއަށް ހުކުމް ކޮށްފިއެވެ.
މެންބަރު ޝަރީފަށް ހަމަލާދީފައިވަނީ ރިޔާސީ އިންތިހާބުގެ ދެވަނަ ބުރުގައި ވޯޓުލުން ކުރިއަށްދިޔައިރު، އިދާރީ ކަންކަމަށް އެމްޑީޕީން މެންހަޓަންގެ ތަނެއް ނަގާފައި ވަނިކޮށް އެތަނުގައި އިންތިހާބުގެ ކަންކަމުގައި ޝަރީފް އުޅެނިކޮށެވެ.
މި މައްސަލައިގައި ދައުލަތުން ދައުވާ ކޮށްފައިވަނީ އަހުމަދު ލައްމާހު ނިޒާމް، ސ. ހުޅުދޫ، ހެޕީބާޑްގެ މައްޗަށެވެ. މީނާގެ މައްޗަށް ވަނީ، އަނިޔާއެއް ދިނުމުގެ ދައުވާ، މުދަލަށް ގެއްލުން ދިނުމުގެ ދައުވާ އަދި އެނގިހުރެ ހުއްދަނޫން ތަނަކަށް ވަނުމުގެ ދައުވާ އުފުލާފައެވެ. އަދި މިމައްސަލައިގައި މީނާގެ އިތުރުން، އިތުރު ބައެއްގެ މައްޗަށްވެސް ވަނީ އެނގިހުރެ ހުއްދަނޫން ތަނަކަށް ވަނުމުގެ ދައުވާ ކޮށްފައެވެ.
އަހުމަދު ލައްމާހު ނިޒާމްގެ މައްޗަށް އުފުލާފައިވާ އަނިޔާއެއް ދިނުމުގެ ދައުވާ ގައި ބުނެފައިވަނީ 30 ސެޕްޓެމްބަރު 2023 ވަނަ ދުވަހު އިބްރާހިމް ޝަރީފް، ގަލޮޅު މެންހެޓަން ބިޒްނަސް ހޮޓެލްސްގެ ރޫމެއްގައި ހުއްޓައި އެތަނަށްވަދެ ޝަރީފުގެ ވާއަތު ލޯމަތީގައި ޖަހައި އަނިޔާ ކޮށްފައިވާކަމަށެވެ. މީނާގެ މައްޗަށް، މުދަލަށް ގެއްލުންދިނުމުގެ ދައުވާ ކޮށްފައިވަނީ، ޝަރީފް އަޅައިގެންހުރި އައިނު ހަލާކު ކޮށްލުމުންނެވެ. ހުއްދަ ނެތް ތަނަކަށް ވަނުމުގެ ދައުވާ ކޮށްފައިވަނީ، ޝަރީގެ ބެލުމުގެ ދަށުގައި ގަލޮޅު މެންހެޓަން ބިޒްނަސް ހޮޓެލްސްގެ ރޫމެއް ހުއްޓާ އެތަނަށް ޝަރީފްގެ ހުއްދަނެތި ވަދެފައިވާ މައްސަލައިގައެވެ.
މިމައްސަލައިގައި އަހުމަދު ލައްމާހު ނިޒާމް ވަނީ ދައުވަލަތާއެކު އިއުތިރާފު އެއްބަސްވުމެއް ހަދާފައެވެ.
އެހެންކަމުން އިއްޔެ ކްރިމިނަލް ކޯޓުން ވަނީ، މީނާގެ މައްޗަށް ކޮށްފައިވާ އަނިޔާއެއް ދިނުމުގެ ދައުވާގައި 2 މަހާއި 12 ދުވަހުގެ ޖަލު ހުކުމެއް އިއްވާ، މީނާ މިމައްސަލައިގައި ބަންދުގައި ހޭދަކުރި މުއްދަތު ޖަލު އަދަބުން އުނިކުރުމުން ތަންފީޒު ކުރަންޖެހޭ ޖަލު އަދަބުގެ މުއްދަތަކީ 12 ދުވަސް ކަމަށްވަނީ ކަނޑައަޅާފައެވެ. އަދި އެ މުއްދަތު ޖުރިމަނާގެ އަދަބަކަށް ބަލަދަުކޮށް ވަނީ 2400 ރުފިޔާއިން ޖުރިމަނާ ކޮށްފައެވެ. މުދަލަށް ގެއްލުންދިނުމުގެ ދައުވާގައި މީނާގެ މައްޗަށް ވަނީ 9 ދުވަހަށް ޖަލަށް ލުމަށް ހުކުމްކޮށް އެ ޖަލު ހުކުމް ޖުރިމަނާ އަދަބަށް ބަދަލުކޮށް 1800 ރުފިޔާއިން ޖުރިމަނާ ކޮށްފައެވެ. މީގެއިތުރުން އެނގިހުރެ ހުއްދަނޫންތަނަކަށް ވަނުމުގެ ދައުވާއާ ގުޅިގެން ވަނީ 4 ދުވަހަށް ޖަަލަށް ލުމަށް ހުކުމްކޮށް، އެ ޖަލު އަދަބު ޖުރިމަނާއަށް ބަދަލުކޮށް 800 ރުފިޔާއިން ޖުރިމަނާ ކޮށްފައެވެ.