ރައްޔިތުންގެ މަޖިލީހުގެ ފުރަތަމަ ދައުރުގެ ޗުއްޓީއަށްފަހު އިޒްރޭލު ޕާސްޕޯޓުގެ މައްސަލަ ބާރަށް ކުރިއަށްދާނެ ކަމަށް ރައީސް އޮފީހުން ބުނެފި އެވެ.
އިޒްރޭލު ފަތުރުވެރިންނަށް ރާއްޖެ ނާދެވޭ ގޮތަށް އެ ގައުމުގެ ޕާސްޕޯޓު މަނާކުރަން އިމިގްރޭޝަންގެ ގާނޫނަށް އިސްލާހު ގެނައުމަށް ހުށަހެޅި ބިލު ރައްޔިތުންގެ މަޖިލީހުގެ ސަލާމަތީ ޚިދުމަތްތަކާ ބެހޭ (241) ކޮމިޓީގައި އޮންނަތާ މިހާރު ވަނީ އެތައް މަހެއް ވެފަ އެވެ.
ރައީސް އޮފީހުގައި މިއަދު ބޭއްވި ނޫސްވެރިންގެ ބައްދަލުވުމުގައި އެ އޮފީހުގެ ތަރުޖަމާނު ހީނާ ވަލީދު ވިދާޅުވީ މި ސަރުކާރަކީ ފަލަސްތީނުގެ މިނިވަން ކަމަށް އެންމެ ބޮޑަށް ވަކާލާތު ކުރާ އެއް ސަރުކާރު ކަމަށާއި ފަލަސްތީނާއި މެދު ސަރުކާރުން ގެންގުޅޭ ސްޓޭންޑް ބަދަލު ނުވާ ކަމަށެވެ.
"މިހާރު ރައްޔިތުންގެ މަޖިލިސް މި އޮތީ ޗުއްޓީގައި. އިރާދަކުރެއްވިޔާ ޗުއްޓީއަށް ފަހު މަޖލިސް ފެށިގެންދާއިރުގައި މި މަސައްކަތްތައް ވަރަށް ބާރަށް ކުރިޔަށްދާނެ،" ހީނާ ވިދާޅުވި އެވެ.
ފަލަސްތީނަށް އެހީވުމަށް ސަރުކާރުގެ އިސްނެންގެވުމުގެ މަތިން ކުރިއަށްގެންދިޔަ ޓެލެތޯނުން ލިބުނު ފައިސާ މިހާރު އަންރުވާ އެކައުންޓަށް ޖަމާކުރެވިފައިވާ ކަމަށް ހީނާ ވިދާޅޫވި އެވެ. އަދި ފަލަސްތީނުގެ ރައްޔިތުންނަށް ހަދިޔާ ކުރުމަށް ސަރުކާރުން ނިންމި މަސް ދަޅު ކޭސްތަކުގެ ފުރަތަމަ ޝިޕްމަންޓް މި މަހުގެ 15 ވަނަ ދުވަހު ފުރުވާލުމަށް ތައްޔާރުވެފައިވާ ކަމަށާއި ފުރަތަމަ ޝިޕްމަންޓުގައި 7800 ކޭސް ފޮނުވާނެ ކަމަށް ހީނާ ވިދާޅުވި އެވެ.
އިޒްރޭލު މީހުންނާއި އެ ގައުމުގެ ޕާސްޕޯޓު އޮންނަ އެންމެންނަށް ރާއްޖެ ނާދެވޭ ގޮތަށް ގާނޫނަށް އިސްލާހު ގެންނަން ބިލެއް ހުށަހެޅުމުން ސަރުކާރުން ވަނީ ކޮމިޓީ މަރުހަލާގައި ބިލަށް އިސްލާހުތަކެއް ގެންނަން ނިންމާފަ އެވެ.
މިދިޔަ އޮކްޓޫބަރު މަހުގެ 7 ވަނަ ދުވަހުން ފެށިގެން އިޒްރޭލުން ދެމުންދާ ހަމަލާތަކުގައި ގާޒާ އިން ޝަހީދުވި މީހުންގެ އަދަދު ވަނީ 40،000 އަށް ވުރެ މައްޗަށް އަރާފަ އެވެ.