ކޮވިޑް-19 ގެ ދުވަސްވަރު އިންޑިއާ އިން ރާއްޖެ އަށް ހަދިޔާކުރި ވެކްސިން ޖެހުމުން ކުއްލި މަރުތައް އިތުރުވެފައިވާ ކަމަށް ފޭދޫ ދެކުނު ދާއިރާގެ މެންބަރު އިބްރާހީމްދީދީ (އައިބީ) ވިދާޅުވެއްޖެ އެވެ.
ކުރީ ސަރުކާރަށް ފާޑުކިޔުންތައް އަމާޒުކުރަމުން ރޭ "ސަންގުޓީވީ"ގައި ވާހަކަދައްކަމުން އައިބީ ވިދާޅުވީ ކޮވިޑް ދުވަސްވަރު ދިވެހިންގެ ގަޔަށް ޖެހި ވެކްސިނަކީ ޓެސްޓު ވެސް ނުކުރާ އެއްޗެއްކަން ފަޅާ އަރާފައިވާ ކަމަށާއި އެ ވެކްސިން ޓެސްޓު ކުރަން ޖެހީ ދިވެހިންގެ ގަޔަށް ކަމަށެވެ.
"ކޮވިޝީލްޑޭ ކޮންމެވެސް އެއްޗެކޭ ކިޔައިގެން ގެނެސް ހަމަ ޖެހިޖެހީނުން މިހާރު ގޮތް ނޭނގޭ ކުއްލި މަރުވަނީ ހެސްކިޔާފައި މީހުން. ލޭގަނޑު ވަނީޔޯ، ޑޮކްޓަރުން އެބަ ބުނޭ މިހާރު އެހެން،" އައިބީ ވިދާޅުވި އެވެ.
އައިބީ ވިދާޅުވީ މި ވެކްސިންގެ ސަބަބުން މީހާގެ ލޭގަނޑުވާ ކަމަށް ސައިންސްވެރިން ބުނާ ކަމަށާއި ލޭގަނޑު ވުމުން ޒުވާނުންނަށް ވެސް ސްޓްރޯކާއި ހާޓް އެޓޭކް ޖެހޭނެ ކަމަށެވެ. އަދި ކުއްލިއަކަށް ޒުވާނުން ވެސް އާދަޔާ ހިލާފަށް މަރުވާން ފަށާފައިވާ ކަމަށްވެސް އައިބީ ވިދާޅުވި އެވެ.
އައިބީ މިހެން ވިދާޅުވި އިރު ކޮވިޝީލްޑް ވެކްސިނަކީ ކޮވިޑް-19 އިން ދިފާއުވުމަށް ހާއްސަ ކޮށްގެން، އިނގިރޭސިވިލާތުގެ އޮކްސްފޯޑް ޔުނިވާސިޓީއާއި އަސްޓްރާޒެނެކާ ކުންފުނި ގުޅިގެން ތަރައްގީކޮށް، ސީރަމް އިންސްޓިޓިއުޓް އޮފް އިންޑިއާ (އެސްއައިއައި) އިން ސިނާއީ ފެންވަރުގައި އުފައްދާފައިވާ ވެކްސިނެކެވެ.
ކޮވިޑް-19ގެ ދުވަސްވަރު އަވަށްޓެރި ގައުމުތަކަށް ވެކްސިން ހަދިޔާ ކުރުމަށް އިންޑިއާ އިން ހިންގި މަޝްރޫއުގެ ދަށުން، އެ ގައުމުން އެންމެ ފުރަތަމަ ކޮވިޑް ވެކްސިން ފޯރުކޮށްދިން ގައުމަކީ ރާއްޖެ އެވެ. އިންޑިއާގެ އިތުރުން ޗައިނާ އިން ވެސް ރާއްޖެ އަށް ވެކްސިން ހަދިޔާކޮށްފައިވެ އެވެ.
ރާއްޖޭގެ އާބާދީގެ ގިނަ ބަޔަކު ވަނީ ވެކްސިންގެ ދެ ޑޯޒު ފުރިހަމަކޮށްފަ އެވެ.