މެކްސިކޯ، ކެނަޑާ އަދި އެމެރިކާގައި 2026 ވަނަ އަހަރު ބާއްވާ ފީފާ ވޯލްޑް ކަޕް ކޮލިފައިންގައި ރޭ ކޮލަމްބިއާ އިން 2-1 އިން އާޖެންޓީނާ ބަލިކޮށްފި އެވެ.
މި މެޗުން ބަލިވި ނަމަވެސް ދެކުނު އެމެރިކާ ބައްރުގެ ކޮލިފައިންގެ އެއްވަނައިގައި އަދިވެސް އޮތީ އާޖެންޓީނާ އެވެ. އާޖެންޓީނާ އެއްވަނައިގައި އޮތީ 8 މެޗުން 18 ޕޮއިންޓު ހޯދައިގެންނެވެ. ދެވަނައިގައި 8 މެޗުން ލިބުނު 16 ޕޮއިންޓާ އެކު އޮތީ ކޮލަމްބިއާ އެވެ. ތިންވަނައިގައި 15 ޕޮއިންޓާ އެކު އޮތީ އުރުގުއޭ އެވެ.
ކޮލަމްބިއާގެ ދަނޑުގައި ރޭ ކުޅުނު މެޗުގައި އަނިޔާގެ ސަބަބުން އާޖެންޓީނާގެ ކެޕްޓަން ލިއޮނަލް މެސީ ކުޅެފައި ނުވާއިރު، މެޗުގެ 25 ވަނަ މިނެޓްގައި ޔޭސަން މޮސްކޭރާ ވަނީ ކޮލަމްބިއާ އަށް ލީޑު ނަގައިދީފަ އެވެ. މިއީ ހަމޭސް ރޮޑްރިގޭޒް ނަގައިދިން ހުރަހެއް ބޮލުން ގޯލަށް ވައްދާލައިގެން ކާމިޔާބު ކުރި ގޯލެކެވެ.
ނަމަވެސް ދެވަނަ ހާފު ފެށިގެން މާގިނަ އިރުތަކެއް ނުވެ ނިކޮލަސް ގޮންޒާލޭޒް ވަނީ އާޖެންޓީނާ އަށް ނަތީޖާ އެއްވަރުކޮށްދީފަ އެވެ. ގޮންޒާލޭޒް މި ގޯލު ކާމިޔާބު ކުރީ ބޯޅަ ހިފައިގެން ކޮލަމްބިއާގެ އޭރިއާ ތެރެއަަށް ވަދެ ފޮނުވާލި ހަމަލާއަކުންނެވެ. އާޖެންޓީނާ އިން ނަތީޖާ އެއްވަރުކުރިތާ މާގިނަ އިރުތަކެއް ނުވަނީސް މެޗުގެ 56 ވަނަ މިނެޓްގައި ލިބުނު ޕެނަލްޓީއަކުން ކޮލަމްބިއާ ވަނީ އަލުން ލީޑު ނަގާފަ އެވެ. މި ޕެނަލްޓީ ކާމިޔާބުކޮށްދީ ކޮލަމްބިއާގެ ދެވަނަ ގޯލު ކާމިޔާބުކޮށްދިނީ މި މެޗުގައި މޮޅު ކުޅުމެއް ދެއްކި ރޮޑްރިގޭޒް އެވެ.
މެޗުގެ ފަހު ވަގުތުކޮޅުތެރޭ ލީޑު ފުޅާކޮށްލަން ކޮލަމްބިއާ އަށް ރަނގަޅު ފުރުސަތުތަކެއް ލިބުނު ނަމަވެސް އޭގެ ބޭނުން އެންމެ ރަނގަޅަށް ވަނީ ހިފޭގޮތް ނުވެފަ އެވެ.
މިއީ 2019 ވަނަ އަހަރަށް ފަހު ކޮލަމްބިއާ އިން އާޖެންޓީނާ ބަލިކުރި ފުރަތަމަ ފަހަރެވެ. އަދި މިއީ އެންމެފަހުން ބޭއްވި ކޮޕަ އެމެރިކާ ފުޓްބޯޅަ މުބާރާތުގެ ފައިނަލަށްފަހު މި ދެ ޓީމުގެ ފުރަތަމަ ކުރިމަތިލުމެވެ. ކޮޕަ އެމެރިކާގެ ފައިނަލްގައި އާޖެންޓީނާ އިން ވަނީ 1-0 އިން ކޮލަމްބިއާ ބަލިކޮށްފަ އެވެ.