ރައްޔިތުންގެ ވާޖިބަށް ފުލުހުން ހުރަސްއަޅާ ނަމަ ރައްޔިތުން ވެސް “ޒީރޯ ޓޮލަރެންސް” ގައި ނުކުންނަން ޖެހިދާނެ ކަމުގެ އިންޒާރު އެމްޑީޕީގެ ކުރީގެ ރައީސް ޑރ. ޑީޑީ ދެއްވައިފިއެވެ.
ޤައުމީ އިއްތިހާދުގެ ހަރުގޭގައި ރޭ ބޭއްވި ޖަލްސާގައި ވާހަަކަދައްކަވަމުން އޭނާ ވިދާޅުވިގޮތުގައި ރައްޔިތުންނަށް ލިބިދީފައިވާ ޙައްޤުތައް ހޯދުމަށް ކުރަމުންދާ މަސައްކަތަށް ފުލުހުން އަޅަމުންދާ ހުރަސްތަކާ ދެކޮޅަށް “ޒީރޯ ޓޮލަރެންސް”ގައި ރައްޔިތުން ނުކުމެއްޖެ ނަމަ ނަތީޖާ މާ ރަނގަޅެއް ނުވާނެ ކަމަށެވެ.
“ރައްޔިތުންގެ ވާޖިބަށް ފުލުހުން ހުރަސްއަޅާ ކަމަށްވަންޏާ ރައްޔިތުން ވެސް ޒީރޯ ޓޮލަރެންސްގައި ނުކުންނަން ޖެހިދާނެއޭ. ރައްޔިތުން ޒީރޯ ޓޮލަރެންސްގައި ނިކުތީމަ މާކަ ރަނގަޅެއް ނުވާނެ،” ޑރ. ޑީޑީ ވިދާޅުވި އެވެ.
“ރައްޔިތުންނަށް ގާނޫނު އަސާސީގެ ފުރަތަމަ ބާބުގެ ހަތަރު ވަނަ މާއްދާގެ ދަށުން ރައްޔިތުން ޒީރޯ ޓޮލަރެންސްގައި މަގުމައްޗަށް ނުކުންނަންޖެހޭ ހާލަތްތައް ފުލުހުން އަޅުގަނޑުމެންނަށް މެދުވެރި ނުކުރައްވާށޭ.”
މީގެ އިތުރުން ރައްޔިތުންނަށް ގާނޫނު އަސާސީގެ ފުރަތަމަ ބާބުގެ ހަތަރު ވަނަ މާއްދާގެ ދަށުން “ޒީރޯ ޓޮލަރެންސް” ގައި މަގުމައްޗަށް ނުކުންނަން ޖެހޭ ހާލަތް މެދުވެރި ނުކުރުމަށް ވެސް އޭނާ ވަނީ ފުލުހުންނަށް ގޮވާލައިފައެވެ.