ދިވެހިންގެ ފަރާތުން ފަލަސްތީންގެ ރައްޔިތުންނަށް އެހީއެއްގެ ގޮތުގައި ދޭން ނިންމި މަސްދަޅުގެ ފުރަތަމަ ޝިޕްމަންޓް މި މަހުގެ 15 ގައި ފޮނުވަން ނިންމައިފި އެވެ.
ރައީސް އޮފީހުގައި އިއްޔެ ބޭއްވި ނޫސް ކޮންފަރެންސްގައި ތަރުޖަމާނު ހީނާ ވަލީދު ވިދާޅުވީ މަސްދަޅުގެ ފުރަތަމަ ޝިޕްމަންޓް ފޮނުވަން ވާން ޖެހޭ ހުރިހާ ތައްޔާރީތަކެއް މިހާރުވެފައިވާ ކަމަށެވެ. އެހެންވެ މި މަހުގެ 15 ގައި އެ ޝިޕްމަންޓް ފޮނުވައިލެވޭނެ ކަމަށް ވިދާޅުވި އެވެ.
ފަލަސްތީނަށް މަސްދަޅު ހަދިޔާކުރަން ނިންމީ ކުރީގެ ރައީސް އިބްރާހީމް މުހައްމަދު ސޯލިހްގެ ސަރުކާރުގައި މިދިޔަ އަހަރުގެ އޮކްޓޯބަރު މަހުގެ ފަހުކޮޅު އެވެ. ފަލަސްތީނަށް ހަދިޔާކުރަން ނިންމީ ދެ މިލިއަން މަސްދަޅެވެ.
މިދިޔަ އަހަރުގެ އޮކްޓޯބަރު 7 އިން ފެށިގެން ޔަހޫދީ އިޒްރޭލުން ފަލަސްތީނުގެ މުސްލިމު ރައްޔިތުންނާ ދެކޮޅަށް ހިންގަމުންދާ ގަތުލުއާންމާ ވިދިގެން ރާއްޖޭގެ އެކި ހިސާބުތަކުން ފަލަސްތީނަށް އެކި ގޮތްގޮތުން މިހާތަނަށް އެހީވަމުން އައިސްފައިވެ އެވެ. އެގޮތުން މި ސަރުކާރުން ވެސް ދާދި ފަހުން ޓެލެތޯނެއް ބާއްވައި އެއަށް ލިބުނު ފައިސާ އަންރުވާ މެދުވެރިކޮށް މިހާރު ވަނީ ފަލަސްތީނަށް ހަދިޔާކޮށްފަ އެވެ.