ހިންދީ ސިނަމާގެ ދެ ލެޖެންޑެއްގެ މެދުގައި ހިނގައި ދިޔަ އަސަރު ގަދަ ލޯބި، ފިލްމެއްގެ ގޮތުގައި ގެނެސްދޭން ނިންމައި އެކަން އިއުލާންކޮށްފި އެވެ.
އެގޮތުން މިއަދު އިއުލާންކުރި ފިލްމަކީ ކަމަލްގެ އާއިލާ ވެސް ހިއްސާވާ ގޮތަށް ސާރޭގާމާ އިންޑިއާ އާއި ލަޔަންހާޓް ސިނެމާ ގުޅިގެން ގެނެސްދޭން ނިންމި "ކަމަލް އޯރް މީނާ" އެވެ. މިއީ ކުރީގެ މަޝްހޫރު ޑައިރެކްޓަރު ކަމަލް އަމްރޯހީ އާއި ކުރީގެ ބަތަލާ މީނާ ކުމާރީގެ ލޯބީގެ މައްޗަށް ބިނާކޮށް ހަދާ ފިލްމެކެވެ.
ކަމަލް އަކީ "ޓްރެޖެޑީ ކްއީން" ގެ ނަމުން މަޝްހޫރުވި އަދ ވަރަށް ޒުވާން އުމުރުގައި މަރުވި މީނާގެ އެންމެ ފަހުގެ ފިލްމު 1973 ގެ "ޕަކީޒާ" ގެ ޑައިރެކްޓަރެކެވެ. އެ ދެ މީހުންގެ ލޯބީގެ ގުޅުމެއް އުފެދުނު އިރު މީނާގެ އުމުރުން އެންމެ 18 އަހަރެވެ. އަދި ކަމަލް އަށް 35 އަހަރެވެ. އޭރު އޭނަ އަކީ ކައިވެނިކޮށް ދަރިން ވެސް ލިބިފައިވާ މީހެކެވެ.
ހިންދީ ސިނަމާގެ މަސައްކަތުގެ ތެރެއިން އުފަންވި މި ލޯބީގެ ވާހަކަ އަކީ ވަރަށް ގިނަ ބައެއްގެ ސަމާލުކަން ހުއްޓުނު ގުޅުމެކެވެ.
އެގޮތުން "ކަމަލް އޯރް މީނާ" ފިލްމެއްގެ ގޮތުގައި ގެނެސްދޭން ހަވާލުވީ ޑައިރެކްޓަރު ސިދާތު ޕީ މަލްއުތުރާ އެވެ. "ވީ އާ ފެމިލީ" އާއި "ހިޗްކީ" ގެނެސްދިން ޑައިރެކްޓަރުގެ އެންމެ ފަހުގެ ފިލްމަކީ ޖޫންގައި ނެޓްފްލިކްސް އަށް ގެނައި، އާމިރު ޚާންގެ ދަރިފުޅު ޖުނައިދު ޚާންގެ ފުރަތަމަ ފިލްމު "މަޖާރާޖް" އެވެ.
"ކަމަލް އޯރް މީނާ" މިއަދު އިއުލާންކުރި ނަމަވެސް ފިލްމުގެ ކާސްޓުން އަދި އިއުލާނެއް ނުކުރެ އެވެ. އޭއާރް ރަހުމާން މިއުޒިކް ހަދާ ފިލްމުގެ މަސައްކަތް އަންނަ އަހަރު ފަށައި، ބެލުންތެރިންނަށް ފިލްމު ގެނެސްދޭން ނިންމާފައި ވަނީ 2026 ގަ އެވެ.
މީނާގެ ބައޮގްރަފިކަލް ޑްރާމާއެއް ވެސް ހަދަން އޮތީ ނިންމައިފަ އެވެ. އެއީ މަޝްހޫރު ފެޝަން ޑިޒައިނަރު މަނީޝް މަލްއުތުރާ ޑައިރެކްޝަނަށް ނުކުންނަ ފިލްމުގެ ގޮތުގަ އެވެ. ރިޕޯޓްތައް ބުނާ ގޮތުން އޭގައި މީނާގެ ރޯލު ކުޅޭނީ ކްރިތީ ސެނަން އެވެ.