ސަރުކާރު ހިންގާ މައި ޕާޓީ، ޕީޕަލްސް ނެޝަނަލް ކޮންގްރެސް (ޕީއެންސީ) މެންބަރުންގެ އަދަދު 50،000 އަށް އަރާފައިވާ ކަމަށް އެ ޕާޓީގެ ޕާލިމެންޓްރީ ގުރޫޕްގެ ލީޑަރު އަދި ރައްޔިތުންގެ މަޖިލީހުގެ މެޖޯރިޓީ ލީޑަރު އިބްރާހީމް ފަލާހް ވިދާޅުވެއްޖެ އެވެ.
މިއަދު ބޭއްވި ނޫސްވެރިންގެ ބައްދަލުވުމެއްގައި ފަލާހު ވިދާޅުވީ އިލެކްޝަންސް ކޮމިޝަނުގެ ދަފްތަރުގައި ޕީއެންސީގެ މެމްބަރުން އަދަދު އުޅޭނީ ގާތްގަނޑަކަށް 30،000 ގައި ކަމަށާއި މެމްބަރުންގެ އަދަދު އިތުރުކުރަން ގެންދިޔަ ހަރަކާތާއެކު އެ އަދަދު މިހާރު 50،000 އަށް އަރާނެ ކަމަށެވެ.
"ޕާޓީ އޮފީހުގައި ހުރި ފޯމްތަކާއި އެއްކޮށް 50،000 ގައި އުޅެނީ. އިރާދަކުރެވިއްޔާ ނޮވެމްބަރު ނިމޭއިރު 75،000 އާއި އެއްކޮށް ރެކޯޑު ހަދާނެ،" ފަލާހު ވިދާޅުވި އެވެ.
އިލެކްޝަންސް ކޮމިޝަންގެ ސިޔާސީ ޕާޓީތަކުގެ ދަފްތަރުގައިވާ ގޮތުން މިދިޔަ ޖުލައި މަހުގެ 28 ގެ ނިޔަލަށް ޕީއެންސީގައި ތިބީ 28،704 މެންބަރުންނެވެ. ޕީއެންސީއާ ގުޅިގެން މަސައްކަތް ކުރަމުންދާ ޕީޕީއެމްގެ މެންބަރުންގެ އަދަދު އުޅެނީ 34،827 ގަ އެވެ.
ރާއްޖޭގައި މިވަގުތު އެންމެ މެމްބަރުން ގިނަ ޕާޓީގެ ގޮތުގައި އޮތީ އެމްޑީޕީ އެވެ. އީސީގެ ދަފްތަރުގައިވާ ގޮތުން އެމްޑީޕީގައި މިވަގުތު 50،980 މެންބަރުން އެބަ ތިއްބެވެ.