ގުދުރަތީ ކާރިސާތަކުގެ ސަބަބުން ދަނޑުވެރިންނަށް ލިބޭ ގެއްލުންތަކަށް ބަދަލު ހޯދައި ދިނުމަށްޓަކައި އެލައިޑް އިންޝުއަރެންސްގެ ފަރާތުން "ކްރޮޕް ތަކަފުލް" ނަމުގައި އާ ސްކީމެއް ތަޢާރަފުކޮށްފިއެވެ.
މި ސްކީމާ ގުޅޭ ގޮތުން އެ ކުންފުނިން ވަނީ އެގްރިކަލްޗަ މިނިސްޓަރު ޑރ. ޢާއިޝަތު ރަމީލާ އާއި މިނިސްޓްރީގެ އިސްވެރިންނާ މައުލޫމާތު ވެސް ހިއްސާކޮށްފަ އެވެ.
އެގޮތުން ބައްދަލުވުމުގައި "ކުރޮޕް ތަކަފުލް" ސްކީމުގެ ތަފްޞީލުތަކާއި، ދަނޑުވެރިން މި ސްކީމަށް އަހުލުވެރިކުރުމަށް ކުރެވިދާނެ މަސައްކަތްތަކާ ގުޅޭ ގޮތުން ފުޅާ ދާއިރާއެއްގައި މަޝްވަރާތަކެއް ކުރި އެވެ.
ރަމީލާ ވިދާޅުވީ މި ސްކީމަކީ ދަނޑުވެރިންގެ ދިރިއުޅުމަށް ކުރިމަތިވާ ނުރައްކާތަކުން ރައްކާތެރިކަން ހޯދައި ދިނުމަށް އެޅޭ މުހިންމު ފިޔަވަޅެއް ކަމަށެވެ.
"ކުރޮޕް ތަކަފުލް" ސްކީމުގެ ދަށުން، ވިއްސާރަ، ފެންބޮޑުވުން، ވައިގަދަވުން ފަދަ ގުދުރަތީ ކާރިސާތަކުގެ ސަބަބުން ދަނޑުވެރިންގެ ބިންތަކަށާއި އޭގެ އުފެއްދުންތަކަށް ލިބޭ ގެއްލުންތަކަށް ބަދަލު ލިބިދެވޭނެއެވެ. މީގެ އިތުރުން، މި ސްކީމުގެ ސަބަބުން ދަނޑުވެރިކަމުގެ ދާއިރާއަށް އިތުރު އިންވެސްޓްމަންޓްތައް ގެނައުމަށް މަގުފަހިވެގެން ދާނެ އެ އެވެ.
މިނިސްޓަރު ވިދާޅުވީ ކުރިއަށް އޮތް ދުވަސްތަކުގައި ރާއްޖޭގެ އެކި ކަންކޮޅުތަކުގައި ދަނޑުވެރިންނަށް މި ސްކީމާ ގުޅޭ މަޢުލޫމާތު ދިނުމުގެ ސެޝަންތަކެއް ކުރިއަށް ގެންދާނެ ކަމަށެވެ.