ރަޖިސްޓްރީ ނުކޮށް ސިއްހީ ހިދުމަތްދޭ ފަރާތްތަކަށް ފިޔަވަޅު އަޅާނެ ކަމަށް ހެލްތު މިނިސްޓްރީން ބުނެފި އެވެ.
ހެލްތު މިނިސްޓްރީން މިއަދު ކުރި އިއުލާނެއްގައި ބުނީ ރާއްޖޭގައި އެއްވެސް ބާވަތެއްގެ ޞިއްޙީ ޚިދުމަތެއް ދޭންވާނީ، ޞިއްޙީ ޚިދުމަތްދޭ ތަންތަން ހިންގުމާބެހޭ ގަވާއިދުގައި ބަޔާންކޮށްފައިވާ ގޮތުގެމަތިން ޞިއްޙީ ޚިދުމަތް ދޭ ތަން ރަޖިސްޓަރީކޮށް، އޮޕަރޭޓިން ލައިސަންސް ހޯދުމަށްފަހު ކަމަށެވެ. އެހެންކަމުން އެއްވެސް ބާވަތެއްގެ ޞިއްޙީ ޚިދުމަތެއް ރާއްޖޭގައި ދޭންވާނީ މިނިސްޓްރީގައި ރަޖިސްޓަރީކޮށް ލައިސަންސް ހޯދުމަށް ފަހު ކަމަށް ބުނެފައިވެ އެވެ.
ނަމަވެސް ޤާނޫނާއި ޚިލާފަށް މިހާރަކަށް އައިސް އޯލްޓަނޭޓިވް ބޭސްފަރުވާގެ ޚިދުމަތް (ޚާއްޞަކޮށް ދިވެހި ބޭހުގެ ޚިދުމަތާއި ހިޖާމާގެ ޚިދުމަތް) ދެމުންދާކަން ފާހަގަކުރެވިފައިވާ ކަމަށް މިނިސްޓްރީން ބުނެފައިވެ އެވެ.
މިނިސްޓްރީން ވަނީ ޞިއްޙީ ޚިދުމަތް ދިނުމުގެ ޤާނޫނުގެ 20 ވަނަ މާއްދާގައި ވާގޮތުގެމަތިން ރަޖިސްޓަރީނުކޮށް، އަދި ލައިސަންސް ނެތި އެއްވެސް ބާވަތެއްގެ ޞިއްޙީ ޚިދުމަތެއް ރާއްޖޭގައި ދިނުމަކީ ކުށެއް ކަމުގައިވާތީ، މިފަދަ ފަރާތްތަކާ ދޭތެރޭ ޞިއްޙީ ޚިދުމަތް ދިނުމުގެ ޤާނޫނުގެ ދަށުން ފިޔަވަޅު އަޅާނެ ކަމަށް ބުނެފަ އެވެ.