މާލެ ސަރަހައްދުގައި ނުރައްކާތެރި އެކްސިޑެންޓްތައް ވަރަށް ބޮޑަށް އިތުރުވުމާ ގުޅިގެން ޓްރެފިކްގެ ހާއްސަ އޮޕަރޭޝަނެއް ފަށާފައި ވަނިކޮށް ޓްރެފިކް ޕޮލިސް އޮޕަރޭޝަންސްގެ ފުލުހުން އެއްގަމު ދަތުރުފަތުރުގެ ގާނޫނާއި ގަވާއިދުތަކަށް އިތުރަށް އަހުލުވެރިކުރުވުމުގެ ޕްރޮގްރާމެއް ފަށައިފި އެވެ.
އިއްޔެ ފެށި މި ޕްރޮގްރާމް މަސް ދުވަހުގެ މުއްދަތަށް ކުރިއަށް ގެންދަން ވަނީ ނިންމައިފަ އެވެ.
މި ޕްރޮގްރާމުގައި، އެއްގަމު ދަތުރުފަތުރުކު ރުމުގެ ގާނޫނާއި ގަވާއިދުތައް ތަންފީޒު ކުރުން އިތުރަށް ހަރުދަނާ ކުރުމަށް މުވައްޒަފުންނަށް ބޭނުންވާ މައުލޫމާތު ދޭނެ އެވެ. އެގޮތުން، އެއްގަމު ދަތުރުފަތުރުގެ ގާނޫނާއި ގަވާއިދުތައް ތަންފީޒު ކުރުމަށް ބޭނުންވާނެ މުހިންމު މައުލޫމާތުތަކާއި، ގާނޫނު ތަންފީޒު ކުރުމުގައި ދިމާވާ ދަތިތަކާ ކުރިމަތިލައި އެކަންކަން ހައްލު ކުރާނެ ގޮތުގެ މައުލޫމާތު ހިއްސާކުރާނެ އެވެ. އަދި ގަވާއިދާ ހިލާފަށް އުޅނަދު ދުއްވާ މީހުން ހުއްޓުވައި ބަލައި ފާސްކުރުމުގައި ސަމާލުކަން ދޭން ޖެހޭ ކަންކަމުގެ މައުލޫމާތު ވެސް ހިއްސާ ކުރާނެ އެވެ.
މީގެ އިތުރުން، އުޅަނދު ދުއްވުމުގައި ފުލުހުން ވެސް ސަމާލުކަން ދޭން ޖެހޭ ކަންކަމާއި ގާނޫނާއި ގަވާއިދުތަކާ އެއްގޮތަށް ވެހިކަލްތައް ދުއްވުމަށް މައުލޫމާތު ހިއްސާކުރާނެ އެވެ.
މި ޕްރޮގްރާމް ކުރިއަށް ގެންދަނީ ފުލުހުންގެ ރޯޑް ސޭފްޓީ އެވެއާނަސް އެންޑް ޕްރިވެންޝަންގެ ފަރާތުންނެވެ.
މަގުމަތީގެ ސަލާމަތާއި ރައްކާތެރިކަން ކަށަވަރުކުރުމާއި މަގުތަކަކީ ރައްޔިތުންނަށް ރައްކާތެރި ތަނަކަށް ހެދުމަށް މިހާރު ފަށާފައިވާ ހާއްސަ މަސައްކަތްތަކުގެ ތެރެއިން، މަގުމަތީގެ ރައްކާތެރިކަމަށް ހާއްސަ ސަމާލުކަމެއް ދިނުމަށް ފުލުހުން އިލްތިމާސްކޮށްފައިވެ އެވެ.