"ޒިކްރާ ފައުންޑޭޝަން" ގެ ފަރާތުން މިއަހަރުގެ ރަމަޟާންމަހަށް ތައްޔާރުވުމުގެ ގޮތުން އައްޑޫ ސިޓީ ކައުންސިލާއި ގުޅިގެން ހިތަދޫ ގެ ބައެއް މިސްކިތްތައް މަރާމާތުކުމުގެ މަސައްކަތް ފަށައިފިއެވެ.
ހިތަދޫގެ ބައެއް މިސްކިތްތައް މަރާމާތު ކުރުމަށް ހިންގާ ޕްރޮގްރާމާއި ބެހޭގޮތުން 'އައްޑޫލައިވް' އަށް މައުލޫމާތު ދެއްވަމުން "ޒިކްރާ ފައުންޑޭޝަން"ގެ އިސްބޭފުޅަކު ވިދާޅުވި ގޮތުގައި މި ޕްރޮގްރާމްގައި "މަސްޖިދުލްހިދާޔާ" އާއި "މަސްޖިދުއްޝޫރާ" އަދި "މަސްޖިދުއްޛިކުރާ" ުގެ އާބާތުރަ ފިލުވައި ކުލައާއި ދަވާދުލައި ރީތިކުރުމުގެ މަސައްކަތްކުރުން ހިމެނެއެވެ.
މިސްކިތްތައް މަރާމާތު ކުރުމުގެ އިތުރުން "މަސްޖިދުއްޛިކުރާ" މިސްކިތުގައި ކީރިތި ޤުރުއާން ޚަތިމުކޮށް އިމާމުވެ ތަރާވީހު ނަމާދާއި ދަމުނަމާދު ކުރާނެ އިމާމަކު ރާއްޖެއިން ބޭރުން ގެނައުމުގެ މަސައްކަތާއި އަދި މަސްޖިދުއްޛިކުރާ މިސްކިތުގައި ރަމަޟާންމަހުގެ ދުވަސްތަކުގައި ރޯދަވީއްލުމުގެ އިންތިޒާމްތައް ވެސް ޒިކުރާ ފައުންޑޭޝަންގެ ފަރާތުން ގެންދަނީ ހަމަޖައްސަމުން ގެންދާއިރު އިޖުތިމާޢީ ގޮތުން ދީނީ ކަންކަން ކުރިއެރުވުމުގެ މަޤްޞަދުގައި ހިންގާ މި ޕްރޮގްރާމަށް ހެޔޮއެދިވަޑައިގަންނަވާ ވީހާ ގިނަ ފަރާތްތަކެއްގެ އެހީތެރިކަމާއި އެއްބާރުލެއްވުން ބޭނުންވާ ކަމަށް ވެސް "ޒިކްރާ ފައުންޑޭޝަން"ގެ ފަރާތުން ވާހަކަދެއްކި ބޭފުޅާ ވަނީ ފާހަގަކުރައްވާފައެވެ.
"ޒިކްރާ ފައުންޑޭޝަން" އަކީ، އިޖުތިމާޢީ ގޮތުން ދީނީ ކަންކަން ކުރިއެރުވުމަށް އެހީތެރިވެދިނުމާއި، މިސްކިތް ޢިމާރާތް ކުރުމާއި މަރާމާތުކޮށް ބެލެހެއްޓުމަށް މާލީ އެހީތެރިކަން ފޯރުކޮށްދިނުމާއި، ކީރިތި ޤުރުއާން ހިތުދަސް ޙާފިޒުން އުފެއްދުމަށް މަސައްކަތް ކުރުމާއި ޤުރުއާން ކިޔެވުމުގެ ފަންނު ކުރިއަރުވައި މިފަދަ އެކިއެކި ޕްރޮގްރާމްތައް ރާވައި ހިންގުމާއި، އެހެނިހެން ފަރާތްތަކުން ހިންގާ މިފަދަ ޙަރަކާތްތަކަށް މާލީ، ފަންނީ އަދި ތަކެތީގެ އެހީތެރިކަން ފޯރުކޮށް ދިނުމަށް މަސައްކަތް ކުރުމުގެ މަޤްޞަދުގައި މިނިސްޓްރީ އޮފް ހޯމް އެފެއަރޒް ގައި ރަޖިސްޓަރީ ކުރެވިފައިވާ ޖަމްޢިއްޔާ އެކެވެ.