މ. ރަތްމަންދޫ މީހުން ވެސް އެހެން ރަށަކަށް ބަދަލުކޮށް ދޭން އެދިއްޖެ އެވެ.
ރައްޔިތުންގެ ފަރާތުން އެކަމަށް އެދި ރައީސް ޑރ. މުހައްމަދު މުއިއްޒަށް ކައުންސިލުން މިދިޔަ މަހުގެ 15 ގައި ސިޓީއެއް ވެސް ފޮނުވާފައިވެ އެވެ. އެ ސިޓީގައި ބުނެފައި ވަނީ ރަށުގެ ގިނަ ބަޔަކު ކައުންސިލްގެ އިދާރާއަށް ފޮނުވާފައިވާ ޕެޓިޝަން، ސަރުކާރުގެ ކަމާގުޅޭ ފަރާތްތަކަށް ހިއްސާކޮށް، އެ މީހުންނަށް އޮތް ފުރުސަތުތަކަކީ ކޮބައިތޯ ބަލަން އެދިފައިވާ ކަމަށެވެ.
ކައުންސިލަށް ހުށަހެޅި ޕެޓިޝަންގައި ބުނެފައި ވަނީ ރަތްމަންދޫގެ އާބާދީ މަދުވުމާއި އަސާސީ ހިދުމަތްތައް ވެސް އެންމެ އެކަށީގެންވާ ގޮތަށް ލިބުމުގެ ފުރުސަތު ނެތްކަމަށް ފެންނާތީ، ފުރުސަތުތައް ފަހި އާބާދީއަކަށް ރައްޔިތުން ހިޖުރަކުރަން ބޭނުންވާ ކަމަށެވެ.
ރަށުގައި މި ވަގުތު ދިރިއުޅެނީ 239 މީހުންނެވެ. އެއީ 118 އަންހެނުންނާއި 121 ފިރިހެނުންނެވެ. ދަރިވަރުންގެ އަދަދު މަދުވުމުން ރަސްމީ ތައުލީމު ފޯރުކޮށްދެނީ ގްރޭޑް 6 އާ ހަމައަށެވެ. ސްކޫލުގައި ތިބީ އެންމެ 8 ދަރިވަރުންނެވެ. ކިޔަވައި ދޭން ތިބީ ބިދޭސީ ތިން ޓީޗަރެކެވެ.
އެހެން ރަށަކަށް ބަދަލުވާން އެދި ޕެޓިޝަނުގައި ރަތްމަންދޫގެ 114 މީހުން ސޮއިކޮށްފައިވެ އެވެ.
އޭގައި ބުނެފައި ވަނީ މި ސަރުކާރުން އިއުލާންކޮށް އޮތް ފުށިދިއްގަރުފަޅު ހިއްކުމުގެ މަޝްރޫއު ނުވަތަ ރަސްމާލެގެ ތެރެއިން ރަށުގެ ރައްޔިތުންނަށް ބޯހިޔާވަހިކަމުގެ ފުރުސަތު އޮތް ނަމަ އެ ފުރުސަތު ތަނަވަސްކޮށް ދޭން އެދޭ ކަމަށެވެ.
ރަތްމަންދޫ މީހިުން ބަދަލުވާމް އެދުނު އިރު، މިދިޔަ ހަފުތާގައި ހދ. ހިރިމަދޫ ރައްޔިތުން ކ. ތުލުސްދުއަށް ބަދަލުކޮށް ދޭން އެދިފައިވެ އެވެ.