ޒަމާނީ ވަސީލަތްތައް ބޭނުންކޮށްގެން ދަރިން ތަރުބިއްޔަތު ކުރުމާ ގުޅޭ ގޮތުން މައުލޫމާތު ދޭން ހާއްސަކޮށްގެން ޝައިހް މުހައްމަދު އަނީލްގެ ވޯކްޝޮޕެއް މާދަމާ ހއ. މަކުނުދޫގައި ފަށަން ނިންމައިފި އެވެ.
މާދަމާ އާއި ހޮނިހިރު ދުވަހު ކުރިއަށް ގެންދަން ނިންމާފައިވާ މި ވޯކްޝޮޕްގައި ބައިވެރިވާން ބޭނުންވާ މަކުނުދޫގެ އާންމުންނަށް މިހާރު އޮތީ ނަން ނޯޓް ކުރުމުގެ ފުރުސަތު މާދަމާ ހަވީރު 6:00 އާ ހަމައަށް ހުޅުވާލައިފަ އެވެ.
މަކުނުދޫ ޔޫތު ސެންޓަރުގައި ކުރިއަށް ގެންދަން ނިންމާފައިވާ ވޯކްޝޮޕް ފަށަން ހަމަޖެހިފައި ވަނީ މާދަމޭ 8:30 ގަ އެވެ. އަދި އެ ސެޝަން 10:00 އާ ހަމައަށް ކުރިއަށް ދާނެ އެވެ. ވޯކްޝޮޕްގެ ދެވަނަ ދުވަހުގެ ސެޝަންތައް ހޮނިހިރު ކުރިއަށް ދާނީ ހެނދުނު 9:00-12:00 އަށް އަދި މެންދުރު ފަހު 1:30-3:00 އަށެވެ.
އައްޑޫ ހިތަދު އަށް ނިސްބަތްވާ ޝައިހް އަނީލްއާ އެކީ މަކުނުދޫގައި ބާއްވާ ވޯކްޝޮޕަކީ މަހަލްދީޕް ފައުންޑޭޝަނާއި މަކުނުދޫ ކައުންސިކާއި އަންހެނުންގެ ތަރައްގީ އަށް މަސައްކަތްކުރާ ކޮމިޓީ އާއި މަކުނޫ ޔޫތު މޫވްމަންޓާއި އަލް ޙައިރު ފައުންޑޭޝަން ގުޅިގެން ބާއްވާ ވޯކްޝޮޕެކެވެ.