ދިރިއުޅުމުގެ ހުޅުމާލެ އިން 16 ބިމެއް ވިއްކަން ހައުސިން ޑިވެލޮޕްމަންޓް ކޯޕަރެޝަން (އެޗްޑީސީ) އިން ހުޅުވާލައިފި އެވެ.
އެ ކުންފުނިން ބުނީ ބިން ވިއްކަން ނިންމީ ދެވަނަ ފިޔަވަހީގެ ބީޗް ފްރަންޓާއި، ބީޗް ސައިޑުން ކަމަށެވެ. އެގޮތުން ބީޗް ފްރަންޓުން ވިއްކަނީ 1،095.98-3،252.00 އަކަފޫޓާ ދެމެދުގެ ބިންތަކެކެވެ. ބީޗް ސައިޑުން ވިއްކަނީ 1،440.80-3،380.00 އަކަފޫޓާ ދެމެދުގެ ބިންތަކެވެ.
ބިންތައް ވިއްކަން ހުޅުވައިލީ ދިވެހިންނަށެވެ.
އެޗްޑީސީން ބުނީ ބިންތައް ގަންނަން ހުށަހަޅަނީ ކުންފުންޏަކުންނަމަ، އެ ކުންފުންޏަކީ ރާއްޖޭގައި ރަޖިސްޓްރީކޮށްފައިވާ 100 ޕަސެންޓް ދިވެހިން ދިވެހިންގެ ހިއްސާވާ ކުންފުންޏަކަށް ވާން ޖެހޭނެ ކަމަށެވެ.
ބިން ވިއްކުން ކުރިއަށް ގެންދަނީ ދެ މަރުހަލާއަކަށް ބަހާލައިގެންނެވެ. ފުރަތަމަ މަރުހަލާ އަކީ އެކްސްޕްރެޝަން އޮފް އިންޓަރެސްޓް (އީއޯއައި) ހުށަހެޅުމެވެ. އަނެއް މަރުހަލާ އަކީ ގަންނަން ކަނޑައަޅާފައިވާ ބިމަށް އެއް ފަރާތަށް ވުރެ ގިނަ ފަރާތުން އީއޯއައި ހުށަހަޅާފައި ވާނަމަ، ބިޑް ކުރުމެވެ.
ބީޗް ފްރަންޓް ބިންތަކުގެ ބީލަން ފެށޭ އަގަކީ 4،500ރ. އެވެ. ބީޗް ސައިޑުން ވިއްކާ ބިންތަކުގެ ބީލަން ފެށޭ އަގަކީ 4،000ރ. އެވެ.
އެޗްޑީސީން ބުނީ ކޮންމެ ފަރާތަކަށްވެސް އެއް ބިމަށް ވުރެ ގިނަ ބިން ގަތުމަށް އީއޯއައި ހުށަހެޅިދާނެ ކަމަށެވެ.
ވިއްކަން ނިންމި ބިންތަކުގެ މައުލޫމާތު އެޗްޑީސީގެ އޮންލައިން ބިޑް ޕޯޓަލް މެދުވެރިކޮށް ލިބޭނެ އެވެ.