ގިނަ ބައެއްގެ ތައުރީފު އޮއްސައިލި ޓީޒާ އަށް ފަހު، އާލިއާ ބަޓްގެ އާ ފިލްމު "ޖިގްރާ" ގެ ރަސްމީ ޓްރެއިލާ މިއަދު އާންމުކޮށްފި އެވެ.
ދައްތައަކާއި ފިރިހެން ކޮއްކޮއެއްގެ ގުޅުމުގެ މައްޗަށް ބިނާކޮށް ހަދާފައިވާ މި ފިލްމަކީ އާލިއާގެ އަމިއްލަ ފިލްމު ކުންފުނި، އިޓާނަލް ސަންޝައިން އާއި ކަރަން ޖޯހަރްގެ ދަރުމާ ޕްރޮޑަކްޝަންގެ އިތުރުން ވައޮކޮމް 18 ގުޅިގެން ހަދާފައިވާ ފިލްމެކެވެ. "ޖިގްރާ" އަކީ "މޮނިކާ، އޯ މައި ޑާލިން" އާއި "މަރުދު ކޯ ދަރުދު ނެހީ ހޯތާ" ގެނެސްދިން ވަސަން ބާލާ ޑައިރެކްޓްކޮށްފައިވާ އެކްޝަން ތުރިލާއެކެވެ.
"ޖިގްރާ" ގައި އާލިއާގެ ކޮއްކޮގެ ރޯލު ކުޅެފައި ވަނީ މިދިޔަ އަހަރު "ދި އާޗީސް" އިން އެކްޓިން ދަތުރު ފެށި އުންމީދީ ޒުވާން އެކްޓަރު ވެދާންގް ރައިނާ އެވެ. މީގެ ކާސްޓްގައި ޝީބާ އާއި މަނޯޖް ޕަހްވާ އާއި ރާހުލް ރަވިންދުރަން އަދި އަދިތިޔާ ނަންދާ ވެސް ހިމެނެ އެވެ.
މި އަހަރުގެ އެންމެ އުންމީދީ ފިލްމުތަކުގެ ތެރޭގައި ހިމެނޭ މި ފިލްމު ބެލުންތެރިންނަށް ދޫކޮށްލާނީ އަންނަ މަހުގެ 11 ގަ އެވެ. "ޖިގްރާ" އަކީ ނެޝަނަލް އެވޯޑް ހޯދާފައިވާ އާލިއާގެ މޮޅު ރޯލެއް ފެންނާނެ ފިލްމެއްކަން ޓްރެއިލާ އިން މި ވަނީ ސާބިތު ވެސް ކޮށް ދީފަ އެވެ.