މަސްތުވާތަކެއްޗާއި ދެކޮޅަށް ފުލުހުން ޅ. ނައިފަރު އަދި ޅ. ހިންނަވަރުގައި އިއްޔެ ކުރިއަށްގެންދިޔަ އޮޕަރޭޝަންގައި 86 ގްރާމުގެ މަސްތުވާތަކެތި އަތުލައިގެންފިއެވެ.
ފުލުހުން އިއްޔެ ވަނީ ފުލުހުންގެ ޑްރަގް އެންފޯސްމަންޓާއި އިންޓެލިޖެންސް އަދި ނޯތް ޕޮލިސްގެ ފުލުހުން ގުޅިގެން ޅ. ނައިފަރު އަދި ޅ. ހިންނަވަރުގައި އޮޕަރޭޝަނެއް ކުރިއަށްގެންދާކަން ހާމަކޮށްފައެވެ.
އެ އޮޕަރޭޝަނާއި ގުޅޭގޮތުން ފުލުހުން މިއަދު ބުނެފައިވަނީ، މި އޮޕަރޭޝަންގައި ހިންނަވަރާއި ނައިފަރު ހިމެނޭގޮތަށް 12 ތަނެއް ބަލައިފާސްކޮށްފައިވާ ކަމަށެވެ. އެ ބަލައިފާސްކުރުމުގެ ތެރޭގައި މަސްތުވާތަކެތި ކަަމަށް ބެލެވޭ ތަކެތި ފެނިފައިވާ ކަމަށާއި، އެތަކެތީގެ ވަގުތީ ބަރުދަނަކީ 86.26 ގްރާމު ކަމަށެވެ. އޭގެ އިތުރުން 293،000 ދިވެހި ރުފިޔާއާއި ޑޮލަރުގެ އިތުރުން ޔޫރޯ ފެނިފައިވާ ކަމަށް ފުލުހުން މައުލޫމާތު ދީފައިވެއެވެ.
މި އޮޕަރޭޝަނުގައި ހައްޔަރު ކުރި މީހުން:
1. ޅ. ހިންނަވަރު / އަގީދުގެ، ހުސެއިން އީސާ ފުޅު، 48 އަހަރު،
2. ޅ. ހިންނަވަރު / މިދިލިމާގެ، އަހްމަދު މުހައްމަދު 36 އަހަރު،
3. ޅ. ނައިފަރު / ޑޭޒީހިޔާ، އަބްދުﷲ ޒަކަރިއްޔާ 46 އަހަރު،
4. ޅ. ހިންނަވަރު / ފެހިގެ، މުހައްމަދު އިރުޝާދު 35 އަހަރު،
5. އދ. މަހިބަދޫ / ކުޅިބަލާގެ، ފާތިމަތު ރީމާ 44 އަހަރު،
ފުލުހުން ބުނެފައިވަނީ މި ފަސްމީހުންގެ އިތުރުން ވެސް މި އޮޕަރޭޝަނުގައި، އިތުރު މީހުން ބަލައިފާސްކޮށްފައިވާ ކަމަށވެެ.
މި ފަސްމީހުންގެ ބަންދާމެދު ގޮތެއް ނިންމުމަށް ކޯޓަށް ހާޒިރުކުރުމުން، ހުސައިން އީސާ ފުޅު އަދި އަހްމަދު މުހައްމަދު 7 ދުވަހަށް، އަބްދުﷲ ޒަކަރިއްޔާ 15 ދުވަހަށް، ފާތިމަތުު ރީމާ 12 ދުވަހަށް އަދި މުހައްމަދު އިރުޝާދު ތިންދުވަހަށް ބަންދުކުރުމަށް އަމުރުކޮށްފައިވާ ކަމަށް މައުލޫމާތު ދީފައިވެއެވެ.