ބާރު ސްޕީޑުގައި ނުރައްކާތެރިކޮށް ދުއްވާފައި ދިޔަ ސައިކަލަކުން ފުލުހެއްގެ ގައިގައި ޖެއްސި މައްސަލާގައި މީހަކު ހައްޔަރުކޮށްފި އެވެ.
އެ މައްސަލައިގައި ހައްޔަރުކޮށްފައިވަނީ މއ. ހިތްތަލަވިލާ، އާދަމް ޒިދާން، 23، އެވެ.
ފުލުހުން ބުނީ އޭނާ ހައްޔަރުކުރީ ރޭ 1:20 ހާއިރު ރަސްފަންނު ކައިރީން ބާރު ސްޕީޑްގައި ނުރައްކާތެރިކޮށް ސައިކަލު ދުއްވުމުން ވީސީޕީ އިން މަޑުކުރަން އިޝާރާތް ކުރުމުން ފުލުހުންގެ އަމުރަށް ނުކިޔަމަންތެރިވެ މަޑުނުކޮށް ދާން އުޅުނު މައްސަލައާ ގުޅިގެން ކަމަށެވެ. އޭނާ ދުއްވި ސައިކަލު ޓޯ ކޮށްފައިވާ ކަމަށް ވެސް ފުލުހުން ވަނީ ބުނެފަ އެވެ.
ފުލުހުން ބުނީ އަމުރަށް ނުކިޔަމަންތެރިވެ ޒިދާން ސައިކަލު މަޑުނުކޮށް ދާން އުޅުމުގެ ތެރޭގައި ފުލުހެއްގެ ގައިގައި ޖެހިފައިވާ ކަމަށެވެ. މި މައްސަލައާ ގުޅިގެން އޭނަގެ ބަންދަށް މުއްދަތު ޖެހުމަށް ކޯޓަށް ހާޒިރު ކުރުމުން ފަސް ދުވަހުގެ ބަންދުގެ މުއްދަތެއް ވަނީ ޖަހާފަ އެވެ.
ޒިދާން އަކީ މިދިޔަ އަހަރު ޑާކް ރެއިން އެންޓަޓައިންމަންޓުން ގެނެސްދިން ފިލްމު "ބީވީމާ" ގައި އެކްޓަރު އިސްމާއީލް ރަޝީދު (ކޮޕީ އިއްސެ) ކުޅުނު އަޔާޒްގެ ކެރެކްޓާގެ ޅަ ދުވަސްވަރުގެ ރޯލު ކުޅުނު އެކްޓަރެވެ.