ޤައުމުގެ ހާލަތު ބަދަލުކުރުމަށް ސަރުކާރާއެކު ޒުވާނުން މަސައްކަތްކުރުމަށް އިކޮނޮމިކް މިނިސްޓަރު މުޙައްމަދު ސަޢީދު އެދިވަޑައިގެންފި
ވިލާކޮލެޖްގެ ފެކަލްޓީ އޮފް ބިޒްނަސް މެނޭޖްމަންޓް ނަންބަދަލު ކުރުމާއި އިންކިއުބޭޝަން ސެންޓަރ އިފްތިތާހީ ރަސްމިއްޔާތުގައި ވާހަކަދައްކަމުން ސަޢީދު ވިދާޅުވީ، ސަރުކާރު ވެރިކަމާއި ހަވާލުވިއިރު ޤައުމު އޮތީ ވަރަށް އުނދަގޫ ހާލަތެއްގައި ކަމަށާއި އެގޮތުން ދަރަނި އޮތީ 122 ބިލިއަން ރުފިޔާގައި ކަމަށްވާއިރު ޒުވާން ތައުލީމީ ޤައުމު ބިނާކުރުމަށް ރައީސް ޑރ. މުހައްމަދު މުއިއްޒު މަސައްކަތް ކުރައްވަމުން ގެންދަވާ ކަމަށެވެ.
ސަރުކާރުގެ ދައުވަތަކީ ފިކުރު އެއްކިބާކޮށް ޤައުމުގެ ތަރައްޤީއަށް ޒުވާނުން ނިކުތުން ކަމަށާއި އަދި ޤައުމު ބިނާކުރުމަށް ކުރަމުންދާ މަސައްކަތުގައި ބައިވެރިވުމަށް ޒުވާނުންނަށް ވަނީ ދައުވަތު ދެއްވާފަ އެވެ.
"ތިބޭފުޅުންނާއިއެކު މަސައްކަތްކުރުމުގައި އެއްވެސް ހުރަހެއް ނޯންނާނެ. އަޅުގަނޑުމެންނަށް ކުރެވޭނެ ކޮށްދެވޭނެ ކަންތައްތައް އަޅުގަނޑުމެންނަށް ފަހިކޮށްދެވޭނެ. އެއީ ރާއްޖޭގެ ހުރިހާ ކޮލެޖްތަކަށް ސްކޫލްތަކަކަށްވެސް. އެހެންވީމަ އަޅުގަނޑު އެދެނީ ސަރުކާރާއެކުގައި ރައީސުލްޖުމްހޫރިއްޔާގެ ފަހަތްޕުޅުގައި ތިބޭފުޅުން ނޭޝަން ބިލްޑިންއަށް އައު ޖޯޝެއްގައި އައު ފޯރިއަކާއިއެއްކޮށް މަސައްކަތް ކޮށްދެއްވުން. އިނޮވޭޓިވް އައު ސެކްޓަރތަކަށް ވަދެވަޑައިގަތުމަށްޓަކައި މަސައްކަތްތަކެއް ކުރެއްވުން. އަޅުގަނޑުމެން ޤައުމުގެ ރޭޓިން ބަދަލުކުރާނަން އިރާދަކުރެއްވިއްޔާ. އަޅުގަނޑުމެން ދަރަނި އަރަންޏަށް ހެދޭނީ އަޅުގަނޑުމެން އެންމެން އެކުގައި އެއްކޮށް މަސައްކަތްކޮށްގެން." ސައީދު ވިދާޅުވި އެވެ.
ވިލާ ކޮލެޖުން ތަޢާރަފުކުރި އިންކިއުބޭޝަން ސެންޓަރަކީ ވިޔަފާރިތަކަށް މަގުދައްކައިދީ، އިރުޝާދާއި ލަފާ ފޯރުކޮށްދޭނެ މަރުކަޒެކެވެ. މި މަރުކަޒުގައި އެކި ދާއިރާތަކުގެ ވިޔަފާރިތަކަށް ބޭނުންވާ ޚިދުމަތްތަކާއި ވަސީލަތްތައް ޤާއިމުކުރެވިފައި ހުރެ އެވެ.