ރާޖްކުމާރު ރާއޯ އާއި ޓްރިޕްތީ ދިމްރީގެ މަޖާ ރޯލުތަކެއް ފެންނާނެ ފިލްމު "ވިކީ ވިދިއާ ކާ ވޯ ވާލާ ވީޑިއޯ" ގެ ޓްރެއިލާ މިއަދު ދައްކާލައިފި އެވެ.
ނުވަދިހައިގެ ތެރޭގައި ހިނގާ ހެއްވާ މަޖާ ހާދިސާތަކެއް ދައްކުވައިދޭ މި ފިލްމަކީ "ޑްރީމް ގާލް" ގެ ދެ ފިލްމު ގެނެސްދިން ރާޖް ޝާންޑަލިޔާ ޑައިރެކްޓްކޮށްފައިވާ ފިލްމެކެވެ. އެކްތާ ކަޕޫރްގެ ބާލާޖީ އާއި ބުޝަން ކުމާރުގެ ޓީ ސީރީޒް ގުޅިގެން ގެނެސްދޭ "ވިކީ ވިދިއާ ކާ ވޯ ވާލާ ވީޑިއޯ" ރިލީޒްކުރަން ހަމަޖެހިފައި ވަނީ އަންނަ މަހުގެ 11 ގަ އެވެ.
މިއީ ރާޖާއި ވިކީ އެކީގައި ކުޅުނު ފުރަތަމަ ފިލްމެވެ. "ވިކީ ވިދިއާ ކާ ވޯ ވާލާ ވީޑިއޯ" ގެ ކާސްޓްގައި މަލިކާ ޝެރާވަތާއި ވިޖޭ ރާޒާއި އަރްޗަނާ ޕުރާން ސިންގް އާއި މުކޭޝް ތިވާރީ އާއި ޓިކޫ ތަލްސާނިއާ އަދި ރާކޭޝް ބޭދީ ހިމެނެ އެވެ.
ފިލްމުގެ ވަރަށް ހާއްސަ ދެ ލަވަކުން ޝެހެނާޒް ގިލް އާއި މަޝްހޫރު ލަވަކިޔުންތެރިޔާ ޑެލަރު މެހެދީ ވެސް ފެންނާނެ އެވެ.
"ވިކީ ވިދިއާ ކާ ވޯ ވާލާ ވީޑިއޯ" އަކީ މި އަހަރު ރިލީޒްވާ ޓްރިޕްރީގެ ދެވަނަ ފިލްމެވެ. މިދިޔަ އަހަރުގެ "އެނިމަލް" އިން ބޮޑު މަޝްހޫރު ކަމެއް ލިބުނު ބަތަލާގެ މި އަހަރުގެ ފުރަތަމަ ފިލްމަކީ ޖުލައިގައި ރިލީޒްކުރި ރޮމޭންޓިކް ކޮމެޑީ "ބޭޑް ނިއުސް" އެވެ. ޓްރިޕްތީގެ އިތުރު ދެ ފިލްމެއް އަދި މި އަހަރަށް އެބައޮތެވެ.
އެއީ "ދަޅަކް 2" އާއި "ބޫލް ބުލައްޔާ 3" އެވެ.
ރާޖްގެ އެންމެ ފަހުގެ ފިލްމަކީ މިދިޔަ މަހު ރިލީޒްކޮށް ބެލުންތެރިންގެ ބޮޑު ތަރުހީބެއް އަދިވެސް ލިބެމުން އަންނަ "އިސްތިރީ 2" އެވެ. "ވިކީ ވިދިއާ ކާ ވޯ ވާލާ ވީޑިއޯ" އަކީ މި އަހަރު ރިލީޒްވާ ރާޖްގެ ހަތަރު ވަނަ ފިލްމެވެ. މި އަހަރު ރިލީޒްވި އޭނަގެ ފިލްމުތަކުގެ ތެރޭގައި "ސްރީކާންތު" އާއި "މިސްޓަ އެންޑް މިސިޒް މާހީ" ވެސް ހިމެނެ އެވެ.