އޮލިމްޕަހުގައި މިހާރު ހައުސްފުލް ޝޯތަކެއް ދައްކަމުން އަންނަ ފިލްމު "ކަމަނާ" ގެ ތިނަދޫގެ ޕްރީމިއާ މިރޭ ފިލްމުގެ ލީޑް ބަތަލު ޔޫސުފް ޝަފީއު (ޔޫއްޕެ) އާ އެކީ ބާއްވަން ތައްޔާރުވެއްޖެ އެވެ.
މި ފިލްމުގެ ދެ ޝޯ ތިނަދޫގައި ދައްކަން ހަމަޖެހިފައިވެ އެވެ. އެއީ މިރެ އާއީ މާދަމާ ރޭގަ އެވެ.
"ކަމަނާ" ގެ ތިނަދޫ ޕްރީމިއާ ޔޫއްޕެއާ އެކީ ބާއްވާ އިރު، މި މަހުގެ 5 ވަނަ ދުވަހުގެ ފިލްމުގެ ފުވައްމުލަކު ޕްރީމިއާ ބޭއްވީ ފިލްމުގެ ޓައިޓްލް ރޯލު ކުޅުނު ބަތަލާ މަރިޔަމް އައްޒައާ އެކީގަ އެވެ.
ގެވެށިއަނިޔާގެ ހަގީގީ ހާދިސާތަކެއްގެ މައްޗަށް ހަދާފައިވާ މި ފިލްމަކީ މަހުދީ އަހުމަދުގެ ސްކްރީންޕްލޭއަކަށް ހުސައިން މުނައްވަރު ޑައިރެކްޓްކުރި ފިލްމެކެވެ. ޕްރޮޑިއުސަރު ޝާނީޒް އަލީގެ ސެޓާން ސްޓޫޑިއޯގެ "ކަމަނާ" ގެ ކާސްޓްގައި އައިމިނަތު ރަޝްފާ (އާޝާ) މުހައްމަދު ރަޝީދު (ދަރާ) އަދި ނަތާޝާ ޖަލީލު ވެސް ހިމެނެ އެވެ.
މިދިޔަ މަހުގެ 27 އިން ފެށިގެން މި ފިލްމު ހައުސްފުލްކޮށް އޮލިމްޕަހުގައި ދައްކަމުން އަންނަ އިރު، މިހާތަނަށް އެކި ރަށްރަށުގައި ވެސް ފިލްމު އަޅުވާފައިވެ އެވެ. އަދި ވަރަށް ގިނަ ރަށްތަކެއްގައި އަޅުވަން ތާވަލުކޮށްފައި ވެސް ވެ އެވެ.