ރ. މަޑުއްވަރީ ކައުންސިލުން ހިންގަމުން އައި އެ ރަށު އައިސް ޕަލާންޓު މިފްކޯގެ ދަށަށް ބަދަލުކޮށްފި އެވެ.
މިކަމުގެ އެއްބަސްވުމުގައި އިއްޔެ މިފްކޯގެ ފަރާތުން ސޮއިކުރެއްވީ ވަގުތީ ގޮތުން ކުންފުނި ހިންގެވުމާ ހަވާލުވެވަޑައިގެން ހުންނެވި ޗީފް ފައިނޭންޝަލް އޮފިސަރު (ސީއެފްއޯ) އިލްޔާސް ހަނީފެވެ. ކައުންސިލްގެ ފަރާތުން ސޮއިކުރެއްވީ މަޑުއްވަރީ ކައުންސިލްގެ ރައީސް މުހައްމަދު ސޯދިގެވެ.
މިފްކޯ އިން ބުނީ މި ބަދަލާ އެކީ 750ރ. ގެ ރޭޓުން މަސްވެރީންނަށް އައިސް ޓަނެއް ފޯރުކޮށް ދޭނެ ކަމަށެވެ.
މަޑުއްވަރީ އައިސްޕްލާންޓަކީ މިއީ 25 މެޓްރިކް ޓަނުގެ ފްލޭކްސް އައިސް ޕްލާންޓެކެވެ އަދި 50 ޓަނުގެ އައިސްގެ ސްޓޮކެއް މެއިންޓެއިން ކުރެވޭ ތަނެކެވެ.
މަޑުއްވަރީ އައިސް ޕްލާންޓުން ހިދުމަތް ދޭން ފެށީ ޑިސެމްބަރު 10، 2021 ގަ އެވެ.
އެ ރަށު އައިސްޕްލާންޓް ސަރުކާރުގެ މަސް ކުންފުނި، މިފްކޯއާ ހަވާލުކުރި އިރު، ކުރީގެ ސަރުކާރުން ފެނަކައާ ހަވާލުކޮށްފައިވާ އައިސްޕްލާންޓްތައް ނުހިންގަން އެ ކުންފުނިން ވަނީ ނިންމައިފަ އެވެ. އެހެންވެ އެ އައިސްޕްލާންޓްތައް ބަދަލު ކުރުމާ ގުޅޭ މަރުހަލާ ފިޝަރީޒް މިނިސްޓްރީގެ ފަރާތުން އަންނަނީ ކުރަމުންނެވެ.
ނަމަވެސް މިފްކޯއާ ހަވާލުކޮށްފައިވާ އައިސްޕްލާންޓްތައް ބަދަލުކޮށް ނިމެންދެން އެ ކުންފުނިން އެ އައިސްޕްލާންޓްތަކުން ހިދުމަތް ދޭނެ އެވެ.