އެމެރިކާގެ މަޝްހޫރު ހިސާބު އިލްމުވެރިޔާ ޖޯން ނާޝް ކާރު އެކްސިޑެންޓެއްގައި މަރުވެއްޖެއެވެ.
ބައެއް މީޑިޔާތަކުން ފުލުހުންނާއި ހަވާލާދީ ރިޕޯޓްކޮށްފައިވާ ގޮތުގައި އުމުރުން 86 އަަހަރުގެ ނާޝް އާއި އޭނާގެ އަންހެނުން 82 އަހަރުގެ އެލީޝާ ލާޑް މަރުވެފައިވަނީ ނިއު ޖާޒީގައި ހިނގި ކާރު އެކްސިޑެންޓެއްގައި ކަމަށެވެ. އަދި އެކްސިޑެންޓްގައި ދެމަފިރިން ކާރުން ވިއްސައިގެން ދިޔަ ކަމަށާއި އޭގެ ސަބަބަކީ ސީޓް ބެލްޓް ނާޅައި ތިބުން ކަމަށެވެ.
މި އެކްސިޑެންޓުގައި ނާޝް އާއި އޭނާގެ އަންހެނުން ދަތުރުކުރަމުން ދިޔަ ޓެކްސީގެ ޑްރައިވަރާއި އެހެން ކާރެއްގައި އިން ޕަސިންޖަރަކަށް ވެސް ވަނީ އަނިޔާވެފައެވެ.
އިކޮނޮމިކްސްގެ ދާއިރާ އިން 1994 ވަނަ އަހަރު ނޯބެލް އިނާމު ހާސިލްކޮށްފައިވާ ނާޝް މަޝްހޫރުވެފައި ވަނީ ގޭމް ތިއަރީގައި އޭނާ ކޮށްފައިވާ މަސައްކަތުގެ ސަބަބުންނެވެ. މީގެ އިތުރުން ހިސާބު އިލްމުގެ ދާއިރާ އިން އަބެލް ޕްރައިޒް ވެސް އޭނާ އަށް ވަނީ ލިބިފައެވެ.