ކަރަން ޖޯހަރްގެ ދަރުމާ ޕްރޮޑަކްޝަނުން ޖުލައި މަހުގެ ތެރޭގައި ގެނެސްދިން ކާމިޔާބު ރޮމޭންޓިކް ކޮމެޑީ "ބޭޑް ނިއުސް" އެމެޒޯން ޕްރައިމް ވީޑިއޯ އަށް ދޫކޮށްލައިފި އެވެ.
މި ފިލްމަކީ ވިކީ ކޯޝަލް އާއި ޓްރިޕްތީ ދިމްރީގެ އިތުރުން އައްމީ ވާކް ލީޑް ރޯލު ކުޅުނު ފިލްމެކެވެ.
"ބޭޑް ނިއުސް" އަކީ ދެ މީހަކާ ބާއްވާ ގުޅުމެއްގެ ސަބަބުން މާބަނޑުވާ ޒުވާން އަންހެނަކަށް، އޭނަގެ ދަރިފުޅުގެ ބައްޕަ އަކީ ކާކުކަން ކަށަވަރު ކުރަން ނޭނގި އޮޅުންބޮޅުންވެގެން ހިނގާ މަޖާ ހާދިސާތަކެއް ދައްކުވައިދޭ ފިލްމެކެވެ.
ޖުލައި 19 ގައި ސިނަމާތަކަށް ގެނެސްދީގެން ބޮކްސް އޮފީހުގައި 115.74 ކްރޯޑް ރުޕީސް (14 މިލިއަން ޑޮލަރު) ގެ އާމްދަނީއެއް ހޯދި މި ފިލްމުގެ ޑައިރެކްޓަރަކީ އާނަންދު ތިވާރީ އެވެ. "ބޭޑް ނިއުސް" ހެދީ 80 ކްރޯޑް ރުޕީސް (10 މިލިއަން ޑޮލަރު) ގެ ބަޖެޓަކުންނެވެ.
އާންމުންގެ ތެރޭގައި މި ފިލްމުގެ ބައެއް ލަވަތައް ވެސް ވަރަށް ބޮޑަށް މަޝްހޫރުވެގެން ދިޔަ އިރު، ވިކީގެ މޮޅު ނެށުންތަކެއް ފެނިގެން ދިޔަ "ތޯބަ ތޯބަ" އަކީ ވަރަށް ބޮޑަށް ޓްރެންޑްވި ލަވައެކެވެ.