އިންޑިއާގެ މަޝްހޫރު ބަތަލާ އާލިއާ ބަޓް އަނެއްކާ ވެސް އޭނަގެ ފިލްމަކަށް ލަވައެއް ކިޔައިފި އެވެ.
މި ފަހަރު އޭނަ ލަވައެެއް ރެކޯޑްކޮށްފައި ވަނީ އަންނަ މަހުގެ 11 ގައި ރިލީޒްކުރަން ހަމަޖެހިފައިވާ އެކްޝަން ތުރިލާ "ޖިގްރާ" އަށެވެ. ލަވައާ ބެހޭ މާ ބޮޑު ތަފުސީލަކަށް ނުގޮސް އާލިއާ މިއަދު ވަނީ ފިލްމުގައި އޭނަގެ އަޑުން ކިޔާފައިވާ ލަވައެއް ހިމެނޭނެކަމުގެ އިޝާރާތެއް ވެސް ދީފަ އެވެ. އެއީ އެކްޓަރު އަދި ލަވަކިޔުންތެރިޔާ ދިލްޖީތު ދޮސަންޖާ އެކީ ނަގާފައިވާ ފޮޓޯއަކާ އެކީގަ އެވެ.
ބެލެވޭ ގޮތުން އާލިއާ އާއި ދިލްޖީތު ކިޔާފައިވާ ލަވަ އަކީ "ޖިގްރާ" ގެ ޕްރޮމޯޝަނަލް ލަވައެކެވެ.
ދެހާސް ސޯޅައިގެ "އުޅުތާ ޕަންޖާބް" އަށް އާލިއާ އާއި ދިލްޖީތު ވަރަށް މަގުބޫލުވި ލަވައެއް ކިޔާފައިވެ އެވެ. އެއީ "އިކް ކުޅީ" ގެ ރިމިކްސް ވާޝަނެވެ. މީގެ އިތުރުން 2014 ގެ "ހަމްޓީ ޝަރުމާ ކީ ދުލްހަނިޔާ" ގެ "ސަމްޖާވާ" ލަވައިގައި ވެސް އާލިއާ ހިއްސާވެފައިވެ އެވެ.
އަންނަ މަހު ރިލީޒްކުރާ އޭނަގެ "ޖިގްރާ" އަކީ އަމިއްލަ ފިލްމު ކުންފުނި، އިޓާނަލް ސަންޝައިން އާއި ކަރަން ޖޯހަރްގެ ދަރުމާ ޕްރޮޑަކްޝަންގެ އިތުރުން ވަޔަކޮމް 18 ގުޅިގެން ހަދާފައިވާ ފިލްމެކެވެ. މީގެ ޑައިރެކްޓަރަކީ ވަސަން ބާލާ އެވެ.