އޮލިމްޕަސް ސިނަމާގައި ހައުސްފުލް ޝޯތަކެއް ދައްކަމުން އަންނަ ފިލްމު "ކަމަނާ" ގެ ވަދާއީ ޝޯތަކަށް ތައްޔާރުވެއްޖެ އެވެ.
މިދިޔަ މަހުގެ 27 ގައި އޮލިމްޕަހުގައި ޕްރީމިއާކުރި ފިލްމުގެ ވަދާއީ ޝޯތައް އޮންނާނީ އަންނަ އާދީއްތަ ދުވަހާއި ހޯމައިގަ އެވެ. އެގޮތުން ވަދާއީ ފަސް ޝޯ، އެ ދެ ދުވަހުގެ އެކި ގަޑިތަކުގައި ދައްކަން ހަމަޖެހިފައިވެ އެވެ.
"ކަމަނާ" އަކީ މި ފަހުގެ ތާރީހެއްގައި އޮލިމްޕަހުގައި އެޅުވި ފިލްމުތަކުގެ ތެރެއިން ހައުސްފުލްކޮށް ހުރިހާ ޝޯތަކެއް ދެއްކި ހަމައެކަނި ފިލްމެވެ. މި ފިލްމު މިހާރު ބައެއް ރަށްރަށުގައި ވެސް ދައްކާފައިވާ އިރު، މި ހަފުތާ ބަންދުގައި އެކަނި ވެސް 25 ރަށެއްގައި ފިލްމު ދައްކާނެ އެވެ.
"ކަމަނާ" އުފެއްދި ޝާނީޒް އަލީގެ ސެޓާން ސްޓޫޑިއޯ އިން ބުނީ އަދިވެސް ރަށްރަށުގައި ފިލްމު އެޅުވުމުގެ ފުރުސަތު އޮތް އިރު، މިހާތަނަށް 54 ރަށެއްގައި 82 ޝޯ ދައްކާފައިވާ ކަމަށެވެ.
ގެވެށިއަނިޔާގެ ހަގީގީ ހާދިސާތަކެއްގެ މައްޗަށް ހަދާފައިވާ މި ފިލްމަކީ މަހުދީ އަހުމަދުގެ ސްކްރީންޕްލޭއަކަށް ހުސައިން މުނައްވަރު ޑައިރެކްޓްކުރި ފިލްމެކެވެ. މީގެ ލީޑް ކާސްޓްގައި ހިމެނެނީ މަރިޔަމް އައްޒަ އާއި ޔޫސުފް ޝަފީއު (ޔޫއްޕެ) ގެ އިތުރުން އައިމިނަތު ރަޝްފާ (އާޝާ) އެވެ.