އައްޑޫ ސިޓީގެ ހިތަދޫއަށް ކަރަންޓުގެ ޚިދުމަތް ފޯރުކޮށްދިނުމަށް ފެނަކައިން ގާކޮށްފައިވާ ސަބް ސްޓޭޝަނަށް ގެއްލުން ދިން މައްސަލައިގައި މިހާތަނަށް އެއްވެސް މީހަކު ފުލުހުންގެ ބެލުމުގެ ދަށަށް ގެންގޮސްފައި ނުވާ ކަމަށް ފުލުހުން ބުނެފިއެވެ.
ފުލުހުންގެ މީޑިއާ އޮފިޝަލް ރޭ ވިދާޅުވީ ގޮތުގައި ހިތަދޫ ޝަރަފުއްދީން ސްކޫލް ހުންނަ ސަރަޙައްދަށް ކަރަންޓު ދިނުމަށް ފެނަކަ ކޯޕަރޭޝަނުން ބަހައްޓާފައިވާ ސަބް ސްޓޭޝަނަށް ގެއްލުން ދީ ޓްރާންސްފޯމަރެއްގައި ރޯކޮށްލަން މަސައްކަތް ކުރި ކަމަށް ތުހުމަތުކުރެވޭ މައްސަލަ ބަލަމުންދާ ކަމަށާއި އެހެން ނަމަވެސް އަދި އެއްވެސް މީހަކު ފުލުހުންގެ ބެލުމުގެ ދަށަށް ގެނެސްފައި ނުވާކަމަށެވެ.
ސަބް ސްޓޭޝަނަަށް ގެއްލުން ދިނުމާއި ގުޅިގެން ފެނަކަ ކޯޕަރޭޝަނުން ނެރުނު ބަޔާނެއްގައި ބުނެފައިވަނީ ، ޓްރާންސްފޯމަރަށް ގެއްލުމެއް ލިބުނު ނަމަ އެ ޓްރާންސްފޯމަރު މެދުވެރިކޮށް ކަރަންޓް ދޫކޮށްފައިވާ އައްޑޫ ސިޓީގެ މުހިއްބުއްދީން ސްކޫލް ހިމެނޭ ސަރަަޙައްދުގެ ލޮބުވެތި ރައްޔިތުންނަކަށް ކަރަންޓުގެ ޚިދުމަތް ފޯރުކޮށްދިނުމަށް ދަތިތަކާ ކުރިމަތި ލާންޖެހިދާނެ ކަމަށެވެ.
ސަބް ސްޓޭޝަންއެއްގައި ގެއްލުންދިނުމުގެ ގޮތުން އެތަނަށް ކަރާސީނު އަޅައި ރޯކޮށްލުމުގެ ސަބަބުން ޓުރާންސްފޯމަރަށް ގެއްލުމެއް ނުލިބުނު ނަމަވެސް ސަބް ސުޓޭޝަންގެ ދޮރުގައި އެއްކޮށް ވަނީ އަނދައިގެން ގޮސްފައެވެ.