މާލެއަކީ ރާއްޖޭގެ ވެރިކަން ކުރާ ރަށަށް ވާތީ، މާލެ ލިޔާއިރު ކުރިއަށް އަތޮޅު އިތުރު ނުކުރުމަށް ލޯކަލް ގަވަމެންޓް މިނިސްޓަރު އާދަމް ޝަރީފް އުމަރު އެދިވަޑައިގެންފި އެވެ.
އާދަމް ޝަރީފް އެކްސްގައި ކުރެއްވި ޕޯސްޓެއްގައި ވިދާޅުވީ ގާނޫނު އަސާސީގެ 14 ވަނަ މާއްދާގައި ރާއްޖޭގައި ވެރިކަންކުރާ ރަށަކީ މާލެ ކަމަށް ބަޔާންކޮށްފައިވާ ކަމަށާއި އެކަން ގާނޫނު އަސާސީގައި ބަޔާންކޮށްފައި އޮންނަ އިރު ވެރިކަން ކުރާ ރަށަކީ "ކ.މާލެ" ކަމަށް ބަޔާން ކޮށްފައި ނޯންނަ ކަމަށެވެ.
އަދި ސަރުކާރުގެ ގިނަ ރަސްމީ ލިޔުންތަކުގައި "ކ.މާލެ" ލިޔެފައި ވެސް ނޯންނަ ކަމަށާއި ކ. އަތޮޅުގައި އޮތް ނަމަވެސް މާލެ އަކީ ރާއްޖޭގެ ވެރިކަންކުރާ ރަށަށް ވާތީވެ މާލެ ލިޔާއިރު ކުރިއަށް "ކ"އިތުރުކޮށް "ކ. މާލެ" ލިޔެ ނޫޅޭ ކަމަށް އާދަމް ޝަރީފް ވިދާޅުވި އެވެ.
އެހެންކަމުން "ކ. މާލެ" ލިޔުމަކީ އަދި ކިޔުމަކީ ވެސް ގާނޫނު އަސާސީގައި އޮންނަ ގޮތާއި ހިލާފަށް ކުރާ ކަމެއް ކަމަށް ވިދާޅުވި އެވެ. އަދި މިހާރަކަށް އައިސް "ކ. މާލެ" ލިޔުމާއި ކިއުން އިތުރުވަމުން އަންނަ ކަމަށާއި މިއީ ކުޑަކަމެއް ނޫން ކަމަށް ވިދާޅުވެ އެކަންރަނގަޅު ކުރަން ޖެހޭ ކަމަށް އާދަމް ޝަރީފް ވިދާޅުވި އެވެ.