ޕީޕަލްސް ބޭންކް އޮފް ޗައިނާ އެކީ ރާއްޖެ އިން ކަރަންޓް އެކައުންޓް މުއާމަލާތްތައް ދެ ގައުމުގެ ފައިސާ އިން ކުރުމަށް އެއްބަސްވުމެއްގައި ސޮއިކޮށްފި އެވެ.
އިކޮނޮމިކް މިނިސްޓްރީން މިއަދު ނެރުނު ބަޔާނެއްގައި ބުނީ އެ އެެއްބަސްވުމުގެ ދަށުން ރާއްޖެ އާއި ޗައިނާ އާ ދެމެދު ކަރަންޓް އެކައުންޓް މުއާމަލާތްތަކާއި ސީދާ އިންވެސްޓްމަންޓްތައް ދެ ގައުމުގެ ފައިސާއިން ހިންގަން މަގުފަހިކޮށް ދޭ އޮނިގަނޑެއް ގާއިމު ކުރެވޭނެ ކަމަށެވެ.
އެގޮތުން މީގެ ސަބަބުން ދެ ގައުމުގެ މެދުގައި ވިޔަފާރި އާއި އިންވެސްޓްމަންޓްގެ ގުޅުންތައް އިތުރަށް ހަރުދަނާވެގެން ދާނެ ކަަމަށް ބުންޏެވެ.
މިނިސްޓްރީން ބުނީ އެއްބަސްވުމުގެ ދަށުން ދެ ގައުމުގެ ފައިސާއިން މުއާމަލާތް ކުރަން ފަސޭހަވާނެ ކަމަށާއި ދިވެހި ވިޔަފާރިވެރިންނަށް ޗައިނާއިން މުދާ އިމްޕޯޓް ކުރުމަށް ވެސް ވަރަށް ބޮޑަށް ފަސޭހަވެ، ދެ ގައުމުގެ ބޯޑަރު ހުރަސްކޮށް، ކުރެވޭ އިންވެސްޓްމަންޓްތައް އިތުރުވާނެ ކަމަށެވެ.
މިނިސްޓްރީން ބުނި ގޮތުގައި މިއީ ރާއްޖޭގެ އިގުތިސޯދު ފުޅާކުރުމަށާއި ވިޔަފާރީގެ ގުޅުންތައް މުހިންމު ބައިނަލްއަގުވާމީ ބައިވެރިންނާ އެކު ވަރުގަދަ ކުރުމަށް ރައީސް ޑރ. މުހައްމަދު މުއިއްޒު ގެންގުޅުއްވާ ތަސައްވަރުގެ ތެރެއިން އެޅުނު ވަރަށް މުހިންމު ޔަވަޅެކެވެ.