ރައީސުލްޖުމްހޫރިއްޔާ ކަމުގެ މަގާމާއި ރައީސުލްޖުމްހޫރިއްޔާގެ ނައިބުގެ މަގާމަށް ކުރިމަތިލެވޭ އުމުރަކީ އުމުން 30 އަހަރާއި 65 އަހަރާ ދެމެދު ކަމަށް ކަނޑައެޅުމަށް، ގާނޫނު އަސާސީ އިސްލާހުކުރުމުގެ ބިލެއް ރައްޔިތުންގެ މަޖިލީހަށް ފޮނުވައިފި އެވެ.
މިހާރު ގާނޫނުއަސާސީގެ 109 ވަނަ މާއްދާގެ (ނ) ގައި ބުނެފައިވާ ގޮތުން، ރައީސުލްޖުމްހޫރިއްޔާގެ މަގާމަށް ކުރިމަތިލެވޭނެ އެންމެ ހަގު އުމުރަކީ 35 އަހަރެވެ. ނަމަވެސް އެ މަގާމު ފުރޭނެ އެންމެ ދޮށީ އުމުރެއް ގާނޫނުއަސާސީގައި ބުނެފައެއް ނުވެ އެވެ.
މައުލޫމާތު ލިބިފައިވާ ގޮތުގައި ހޯރަފުށި ދާއިރާގެ މުހައްމަދު އިސްމާއީލް ހުށަހެޅުއްވި މި އިސްލާހުގައި މިހާރު ބުނެފައިވާ ގޮތުން އުމުރުން 30 އަހަރު ފުރިފައިވާ ކޮންމެ މީހަކަށް ރައީސް ކަމުގެ މަގާމަށް ކުރިމަތިލެވޭނެ އެވެ. ނަމަވެސް އުމުރުން 65 އަހަރުވެފައިވާނަމަ ކުރިމައްޗެއް ނުލެވޭނެ އެވެ.
މީގެ ކުރިން ވެސް މުހައްމަދު އިސްމާއީލް ، އުމުރުން 65 އަހަރުވެފައިވާ މީހުންނަށް ރައީސްކަމުގެ މަގާމަށް ކުރިމަތިނުލެވޭ ގޮތަށް ގާނޫނުއަސާސީ އަށް އިސްލާހެއް ހުށަހަޅުއްވި ނަމަވެސް ފަހުން އޭނާ ވަނީ އެ އިސްލާހު އަނބުރާ ގެންދަވާފައެވެ.