ރައީސް ޑރ. މުހައްމަދު މުއިއްޒު އައްޑޫ ސިޓީ އަށް އިސްކަން ދެއްވާ ކަމަށް އިކޮނޮމިކް މިނިސްޓަރު މުހައްމަދު ސައީދު ވިދާޅުވެއްޖެ އެވެ.
އައްޑޫ ސިޓީ ފޭދޫގައި ރޭ ޕީއެންސީގެ ފަރާތުން ބޭއްވި ޖަލްސާއެއްގައި ސައީދު ވިދާޅުވީ ރައީސް މުއިއްޒު އައްޑޫ އަށް ވެވަޑައިގެންނެވި ހުރިހާ ވައުދެއް ފުއްދައިދެއްވާނެ ކަމަށާއި އެމަނިކުފާނު އައްޑޫ އަށް ވަރަށް އިސްކަން ދެއްވާ ކަމަށެވެ.
"ފަސް އަހަރަކަށް ރައީސުލްޖުމްހޫރިއްޔާ ވެވަޑައިގެންނެވި ވައުދު އިރާދަކުރެވިއްޔާ ތުނޑުން ތުނޑަށް، އަކުރުން އަކުރަށް ފުއްދަވާނެ. މި އައްޑޫ ސިޓީ އަށް ރައީސް ޑރ. މުހައްމަދު މުއިއްޒު ވެވަޑައިގެންނެވި ވައުދުތައް ފުއްދަވާނެ،" ސައީދު ވިދާޅުވި އެވެ.
ސައީދު ވިދާޅުވީ މި ސަރުކާރު ވެރިކަމާ ހަވާލުވިއިރު ގައުމު އޮތީ މާޔޫސްކޮށްލާފައި ކަމަށާއި ނަމަވެސް 9 މަސްތެރޭގައި އެ ހާލަތު ރައީސް މުއިއްޒު ބަދަލުކުރައްވާފައިވާ ކަމަށެވެ. ރައީސް މުއިއްޒު މިއަދު ވެރިކަން ކުރައްވަމުން ގެންދަވަނީ ގައުމު ދަރުވާ ނުލައި ކަމަށާއި އެއީ މާޔޫސްކަން އިތުބާރަށް ބަދަލުވާންޖެހޭ ސަބަބެއް ކަމަށްވެސް ސައީދު ވިދާޅުވި އެވެ.
"ރައީސް ޑރ. މުހައްމަދު މުއިއްޒު މިހާތަނަށް ކުރެއްވި މަސައްކަތްޕުޅުން އެއްވެސް ބަޔަކަށް ގައުމެއް ނުއެއް ދަރާ، އެއްވެސް ބިލެއް ނުދެއްކިއެއް ނެތް، އެއްވެސް ލޯނެއް ނުދެއްކިއެއް ނެތް،" ސައީދު ވިދާޅުވި އެވެ.
މީގެއިތުރުން ސައީދު ވަނީ ރާއްޖެ ބަނގުރޫޓު ނުވެގެން ބަޔަކު ކޮންމެ ރެޔަކު ޖަލްސާ ބާއްވައިގެން އުޅޭ ކަމަށާއި ނަމަވެސް އެއަށް ވުރެ މި ސަރުކާރު މާ ހިކުމަތްތެރި ކަމަށްވެސް ވިދާޅުވެފަ އެވެ.