ހުކުރު ނަމާދު ފަދަ ޖަމާޢަތް ބޮޑު ނަމާދުތަކުގައި ބައެއް ޚަޠީބުން ވަރަށް ދިގުކޮށް ކިޔަވާކަމުގެ ޝަކުވާ ލިބެމުންދާ ކަމަށް އިސް،ލާމިކް މިނިސްޓަރު މުހައްމަދު ޝަހީމް އަލީ ސައީދު ވިދާޅުވެއްޖެ އެވެ.
ސޯޝަލް މީޑިއާ ޕޯސްޓެއްގައި މިނިސްޓަރު ވިދާޅުވީ ކަމަށް އެފަދަ ޖަމާޢަތް ބޮޑު ނަމާދުތަކުގައި ސުންނަތްވެގެންވާ ގޮތަކީ ކުރުކޮށް ކިޔެވުން ކަމަށެވެ.
"ޖަމާޢަތުގައި ބަލިމީހުންނާއި އުޒުރުވެރިން އަދި ކުޑަކުދިންވާނެކަން އިމާމުގެ ހަނދާނުގައި ބެހެއްޓުން މުހިންމު." އިމާމުވެ ހުކުރު ކުރައްވާ ޚަތީބުންނަށް އިޝާރާތް ކުރައްވައި މިނިސްޓަރު ވިދާޅުވި އެވެ.
މި ސަރުކާރުން އަންނަނީ ރާއްޖޭގައި ޒުވާން ޚަތީބުންގެ ޖީލެއް ބިނާކުރަން ވެސް މަސައްކަތްތަކެއް ކުރަމުންނެވެ. އެގޮތުން މިހާތަނަށް ހިންގި ޒުވާން ޚަތީބުން ތަމްރީނު ކުރުމުގެ ޕްރޮގްރާމްގެ ދަށުން 300 އަށް ވުރެ ގިނަ ޒުވާނުންނަށް އިމާމުވެ ހުކުރު ކުރިމުގެ ހުއްދަ ދީފައިވެ އެވެ.
އެ ޚަތީބުން މިހާރު އަންނަނީ ރާއްޖޭގެ އެކި ހިސާބުތަކުގައި އިމާމުވެ ހުކުރު ކުރައްވަމުންނެވެ.