ޑައިރެކްޓަރު ސަންޖޭ ލީލާ ބަންސާލީ އަންނަ އަހަރު ގެނެސްދޭން ތާވަލުކުރި ފިލްމު "ލަވް އެންޑް ވޯ" 2026 އަށް ފަސްކޮށްފި އެވެ.
ކާސްޓްގައި ރަންބީރް ކަޕޫރާއި އާލިއާ ބަޓްގެ އިތުރުން ވިކީ ކޯޝަލް ހިމެނޭ މި ފިލްމު ސިނަމާތަކަށް ގެންނަން ކުރިން ނިންމާފައި އޮތީ އަންނަ އަހަރުގެ ޑިސެމްބަރު މަހުގެ ފަހުކޮޅު އެވެ. ނަމަވެސް މިހާރު "ލަވް އެންޑް ވޯ" ބެލުންތެރިންނަށް ދޫކޮށްލަން ނިންމި ތާރީހަކީ މާޗް 20، 2026 އެވެ.
ރިޕޯޓްތައް ބުނާ ގޮތުން ބަންސާލީގެ ފިލްމު ފަސްކުރި މައިގަނޑު ސަބަބަކީ މީގެ ލީޑް ތިން ކާސްޓުން އެހެން ޕްރޮޖެކްޓްތަކެއްގައި ބިޒީކޮށް އުޅެން ޖެހިފައިވާތީ އެވެ. މިދިޔަ މަހު މީޑިއާތަކުން ރިޕޯޓްކުރި ގޮތުގައި "ލަވް އެންޑް ވޯ" ގެ ޝޫޓިން އަންނަ މަހުގެ ތެރޭގައި ފަށަން ވެސް އޮތީ ޕްލޭންކޮށްފަ އެވެ.
ބޮލީވުޑްގެ އެންމެ ހުނަރުވެރި އަދި އެންމެ ކާމިޔާބު ޑައިރެކްޓަރުންގެ ތެރޭގައި ހިމެނޭ ބަންސާލީގެ އެންމެ ފަހުގެ ފިލްމަކީ އާލިއާ އަށް މިދިޔަ އަހަރު ނެޝަނަލް އެވޯޑް ލިބުނު 2022 ގެ "ގަންގޫބާއީ ކަތިއަވާޅީ" އެވެ. "ލަވް އެންޑް ވޯ" އަކީ އެ ފިލްމަށް ފަހު ހުނަރުވެރި ބަތަލާ ބަންސާލީއާ އެކީ މަސައްކަތްކުރާ ދެވަނަ ޕްރޮޖެކްޓެވެ.
އަދި މި ފިލްމަކީ އާލިއާގެ ފިރިމީހާ ރަންބީރް ބޮލީވުޑަށް ނެރުނު ޑައިރެކްޓަރާ އެކީ އޭނަ މަސައްކަތްކުރާ ދެވަނަ ފިލްމެވެ. ރަންބީރްގެ އެކްޓިން ދަތުރުގެ ފެށުމަކީ 2007 ގެ "ސާވަރިއާ" އެވެ.
"ލަވް އެންޑް ވޯ" އަކީ ބަންސާލީއާ އެކީ ނެޝަނަލް އެވޯޑް ހާސިލުކޮށްފައިވާ ވިކީ މަސައްކަތްކުރާ ފުރަތަމަ ފިލްމެވެ.
"ހަމް ދިލް ދޭ ޗުކޭ ސަނަމް" އާއި "ދޭވްދާސް" އާއި "ރާމް-ލީލާ" އާއި "ބަޖިރާއޯ މަސްތާނީ" ގެ އިތުރުން "ޕަދުމާވަތު" ފަދަ ކާމިޔާބު ފިލްމުތައް ގެނެސްދިން ބަންސާލީ ދާދި ފަހުން ވަނީ "ހީރާމަންޑީ: ދަ ޑައިމަންޑް ބާޒާރު" ގެ ނަމުގައި ވަރަށް މަގުބޫލު ވެބް ސީރީޒެއް ވެސް ގެނެސްދީފަ އެވެ.
ނެޓްފްލިކްސް އިން މެއި މަހު ޕްރީމިއާކުރި މި ސީރީޒަކީ 8 އެޕިސޯޑްގެ އެއްޗެކެވެ. "ހީރާމަންޑީ" ގެ ބޮޑު ކާމިޔާބީއާ ގުޅިގެން އޭގެ ދެވަނަ ސީޒަނެއް ވެސް ހަދަން އޮތީ ނިންމައިފަ އެވެ.