ރާއްޖޭގެ މިހާރު އެންމެ ކާމިޔާބު އަދި އެންމެ ބިޒީ ފިލްމު ސްޓޫޑިއޯ، ޑާކް ރެއިން އެންޓަޓައިންމަންޓަށް މިއަދު 18 އަހަރު ފުރުނީ އެވެ. މަރުހަބަ އެވެ.!
ފާއިތުވީ މި މުއްދަތުގެ ތެރޭގައި ޑާކް ރެއިނުން ވަނީ ވަރަށް ކާމިޔާބު ފިލްމުތަކެއް ގެނެސްދީފަ އެވެ. އެ ސްޓޫޑިއޯ އަބަދު ވެސް ފާހަގަކޮށްލެވެނީ ވަރަށް ހަރަކާތެރި ޓީމެއްގެ ގޮތުގަ އެވެ. މި މަސައްކަތުގެ އެންމެ މުގުލުގައި ތިބީ ޕްރޮޑިއުސަދު މުހައްމަދު އަލީ (މޮގާ) އާއި އަންހެނުން އައިޝަތު ފުއާދު ތައުފީގުގެ އިތުރުން ޑައިރެކްޓަރު އަލީ ޝިފާއު އެވެ.
ޑާކް ރެއިނަށް 18 އަހަރު ފުރުމާ ގުޅިގެން ނެރުނު ބަޔާނެއްގައި ބުނީ ވޭތުވެ ދިޔަ 18 އަހަރަކީ ބެލުންތެރިން ބޭނުންވާ ކަހަލަ ފިލްމުތަކެއް ގެނެސްދެވޭތޯ އެ ޕްރޮޑަކްޝަން ހައުސް އިން ބުރަ މަސައްކަތްތަކެއްކުރި ދުވަސްތަކެއް ކަމަށެވެ.
"އަޅުގަނޑުމެންގެ އަމާޒަކީ ބެލުންތެރިންގެ އިތުބާރު ހޯދުން. އަދި ޑާކް ރެއިންގެ ފިލްމުތައް ބަލަންދާ އިރު ފެންވަރާ ދޭތެރޭ އޮންނަ ޔަގީންކަން ދެމެހެއްޓުން." ޑާކް ރެއިނުން ބުންޏެވެ.
އެތަނުން ބުނީ ކުރިއަށް އޮތް ތަނުގައި ވެސް ދެމި ތިބޭނީ އާ ފަންނުވެރިން ދާއިރާ އަށް ނެރުމުގަ އާއި ބެލުންތެރިން މުނިފޫހިފިލުވުމުގެ އިތުރުން ހިތްވަރު ދެނިވި ފިލްމުތައް އުފައްދާ، އަދި ދިވެހި ފިލްމް އިންޑަސްޓްރީގެ ފެންވަރު މިހާރަށް ވުރެން އުހަށް އުފުލާދޭނެ ބައެއްގެ ގޮތުގައި ކަމަށެވެ.
ޑާކް ރެއިނުން މިހާތަނަށް 35 އުފެއްދުމެއް ބެލުންތެރިންނަށް ގެނެސްދީފައިވެ އެވެ. އޭގެ ތެރޭގައި ފީޗާ ފިލްމުތަކާއި ކުރު ފިލްމުތަކާއި ސިލްސިލާތަކާއި ވެބް ސީރީޒްތަކާއި އެންތޮލޮޖީ ހިމެނެ އެވެ.
ޑާކް ރެއިންގެ ކުރިއަށް އޮތް ފިލްމަކީ އަންނަ މަހުގެ 7 ގައި ގެނެސްދޭ ހޮރޯ-ކޮމެޑީ "ބިބީ" އެވެ. މިއީ މި އަހަރު އެތަނުން ގެނެސްދޭނެ ދެވަނަ ފިލްމެވެ. އަދި މިހާރު ސްޓޫޑިއޯގެ 37 ވަނަ ޕްރޮޖެކްޓްގެ މަސައްކަތް ވެސް ދަނީ ކުރިއަށެވެ. އެއީ އަދި ރަސްމީކޮށް ނަން އިއުލާން ނުކުރާ ފީޗާ ފިލްމެކެވެ.
ޑާކް ރެއިނުން ގެނެސްދިން އެންމެ މަގުބޫލު އުފެއްދުންތަކުގެ ތެރޭގައި "ދިން ވޭނުގެ ހިތާމައިގާ"، "ހެޕީ ބާތުޑޭ"، "އެންމެ ފަހު ވިންދާ ޖެހެންދެން"، "ވާށޭ މަށާ އެކީ"، "ގޮށްރާޅު"، "މާމުއި" އަދި މި އަހަރު ގެނެސްދިން "ފުރޭތަ" ހިމެނެ އެވެ. އެ ސްޓޫޑިއޯ އަކީ ރާއްޖޭގެ 3ޑީ ފިލްމު ވެސް ގެނެސްދިން ޓީމެވެ. އެއީ 2013 ގެ "ފަތިސްހަނދުވަރުގެ ފެށުން" އެވެ.
ޑާކް ރެއިނުން ގެނެސްދިން ސީރީޒްތަކުގެ ތެރޭގައި "ގިރިޓީ ލޯބި" އާއި "ރޫމިއާ ޖަންނަތު" ހިމެނެ އެވެ. ކުރު ފިލްމުތަކުގެ ތެރޭގައި "ބަޑި އެދުރު"، "އުންމީދު"، "ދައުވަތު" އަދި "އަނގުރު" ހިމެނެ އެވެ. ސިލްސިލާތަކުގެ ތެރޭގައި "ދަފަރާ"، "ރޭފަނާ"، "އިންތިހާ" އަދި "އެފްބީ!" ހިމެނެ އެވެ.
ޑާކް ރެއިނަކީ ޔަގީނުން ވެސް މިހާރު ދިވެހި އޯޑިއަންސް އެންމެ އިތުބާރު ކުރާ ސްޓޫޑިއޯ އެވެ. އެތަނުގެ ފިލްމެއް ނަމަ ކޮލިޓީވާނެކަމާ ދޭތެރޭ ބެލުންތެރިން މިހާރު ޝައްކެއް ނުކުރާނެ އެވެ. އެހެންވެ އަބަދު ވެސް ޑާކް ރެއިންއާ މެދު ބެލުންތެރިންގެ އުންމީދުތައް ބޮޑެވެ.
އެ ސަބަބާ ހުރެ ކުރިއަށް އޮތް ތަނުގައިި ޝައުގުވެރި، މޮޅު، ރީތި އަދި އެހާމެ ފުރިހަމަ އުފެއްދުންތަކެއް ގެނެސްދޭނެކަމަށް އުންމީދު ކުރަމާ ހިނގާށެވެ.