ސިދާންތު ޗަތުރަވެދީ އާއި މުރްނާލް ތާކޫރް "ތުމް ހީ ހޯ" ކިޔާ އަސަރު ގަދަ ލޯބީގެ ފިލްމެއްގެ މަސައްކަތް ކުރަމުން އަންނަ ކަމަށް ރިޕޯޓްތައް ބުނެފި އެވެ.
ބޮލީވުޑްގެ ޚަބަރުތައް ގެނެސްދޭ މީޑިއާތަކުން ބުނީ މިއީ މަޝްހޫރު ޑައިރެކްޓަރު/ޕްރޮޑިއުސަރު ސަންޖޭ ލީލީ ބަންސާލީ ޕްރޮޑިއުސްކުރާ ފިލްމެއް ކަމަށާއި މީގެ ޑައިރެކްޓަރަކީ ރަވީ އުދިއަވަރް ކަމަށެވެ. އޭނަ އަކީ މި މަހުގެ 20 ގައި ރިލީޒްކުރަން ހަމަޖެހިފައިވާ ސިދާންތުގެ އެކްޝަން ތުރިލާ "ޔުދުރާ" ގެ ވެސް ޑައިރެކްޓަރެވެ.
ކުރީގެ މަޝްހޫރު ބަތަލާ ސްރީދޭވީގެ 2017 ގެ "މޮމް" އަކީ ވެސް ރަވީގެ ފިލްމެކެވެ.
ޕިންލްވިލާ އިން ބުނީ "ތުމް ހީ ހޯ" ގެ މަސައްކަތް ކުރަމުން އަންނަނީ މި އަހަރު މެއި މަހުން ފެށިގެން ކަމަށާއި ފުރަތަމަ ޝޫޓިން ޝެޑިއުލް ނިންމާލާފައި އޮތް އިރު، މި މަހުގެ ފަހުކޮޅު ދެވަނަ ޝެޑިއުލް އުތުރާކަންދުގައި ފަށަން ތައްޔާރުވަމުން އަންނަ ކަމަށެވެ.
ނަމަވެސް މި ފިލްމާ ބެހޭ އެއްވެސް ތަފުސީލެއް ބަންސާލީގެ ފިލްމު ކުންފުނިން އަދި ނުދެ އެވެ. ނަމަވެސް މީޑިއާތަކުން ބުނި ގޮތުގައި "ތުމް ހީ ހޯ" ގައި ސިދާންތާއި މުރްނާލް ވެސް ކުޅެނީ މިއުޒިޝަނުންގެ ރޯލު ކަމަށާއި މިއީ ވަރަށް ހިތްގައިމު ލޯބީގެ ފިލްމަކަށް ވާނެ ކަމަށެވެ.
މީގެ ޓައިޓްލް ނަގާފައި ވަނީ 2013 ގެ "އާޝިގީ 2" ގެ ލަވައަކުންނެވެ.