ސަރުކާރު ހިންގާ މައިޕާޓީ ޕީޕަލްސް ނެޝަނަލް ކޮންގްރަސް (ޕީއެންސީ)އަށް މެންބަރުން އިތުރު ކުރުމުގެ ހަރަކާތެއް އައްޑޫސިޓީ އަދި ކުޅުދުއްފުށިސިޓީގައި ފަށައިފިއެވެ.
ޕީއެންސީން މިއަދު ބުނެފައިވަނީ އެޕާޓީގެ މެންބަޝިޕް އިތުރުކުރުމުގެ ބޮޑު ހަރަކާތް އައްޑޫ އަދި ކުޅުދުއްފުށިސިޓީގައި ކުރިއަށް ގެންދާނީ މިއަދު އަދި މާދަމާ ކަމަށެވެ.
މި ހަރަކާތުގައި އެ ޕާޓީގެ ލީޑަޝިޕްގެ އިސް ބޭފުޅުން އަންނަނީ ހަރަކާތްތެރިވަމުންނެވެ. އެގޮތުން އައްޑޫގައި އަދި ކުޅުދުއްފުށީގައި ޕީއެންސީގެ ލީޑަޝިޕްގެ ބޭފުޅުން ދޮރުން ދޮރަށް ހިނގާ މެންބަރުން އިތުރު ކުރުމުގެ މަސައްކަތް އަންނަނީ ކުރަމުންނެވެ.
ޕީއެންސީގެ މެންބަރުންގެ އަަދަދު 75،000 އަށް އެރުވުމުގެ މަސައްކަތް ކުރުމަށް ނިންމާ އެކަން ރައީސް ޑރ. މުހައްމަދު މުއިއްޒު ހާމަކުރެއްވިއިރު އެ ޕާޓީއަށް މިހާތަނަށް 50،000 މީހުން ސޮއި ކޮށްފައިވާ ކަމަށް ޕީއެންސީގެ ޕާލިމެންޓްރީ ގުރޫޕްގެ ލީޑަރު އަދި ރައްޔިތުންގެ މަޖިލީހުގެ މެޖޯރިޓީ ލީޑަރު އިބްރާހީމް ފަލާހު ވަނީ ވިދާޅުވެފައެވެ.
އިލެކްޝަންސް ކޮމިޝަންގެ ދަފުތަރު ދައްކާގޮތުން މިވަގުތު އެންމެ ގިނަ މެންބަރުން ތިބީ އެމްޑީޕީގައެވެ. އެޕާޓީގައި 50،980 މީހުން ތިބެއެވެ. ދެވަނައަށް މެންބަރުން އެންމެ ގިނަ ޕީޕީއެމްގައި 34،827 މީހުން ތިބިއިރު ޕީއެންސީގައި ތިބީ 28،704 މެންބަރުންނެވެ.