އެންމެ ބޮޑު އަތްތިލަ އާއި ފައިތިލަ ހުރި ފުރާވަރުގެ ކުއްޖާގެ ރެކޯޑް އެމެރިކާގެ ފުރާވަރުގެ ފިރިހެން ކުއްޖަކަށް ލިބިއްޖެ އެވެ.
އެ ދެ ރެކޯޑް ގިނިސް ވޯލްޑް ރެކޯޑުން ދީފައި ވަނީ މިޝިގަން އަށް އުފަން އެރިކް ކިލްބާން ޖޫނިއާ، 16 އަށެވެ. އޭނަގެ އަތްތިލައިގެ ބޮޑު މިނުގައި 23.20 ސެންޓިމީޓަރު ނުވަތަ 9.13 އިންޗި ހުންނަ އިރު، އެރިކްގެ އުމުރުގެ ކުދިންގެ އަތްތިލައިގެ އެވްރެޖް ސައިޒަކީ 19.04 ސެންޓިމީޓަރު ނުވަތަ 7.4 އިންޗި އެވެ.
އެރިކްގެ ފައިތިލައިގެ ބޮޑުމިނަކީ 34.30 ސެންޓިމީޓަރު ނުވަތަ 13.50 އިންޗި އެވެ.
އެރިކް ބުނި ގޮތުގައި ދުނިޔޭގެ ރެކޯޑް ފޮތަށް އޭނަގެ ނަން އެރުމަކީ ލިބުނު ވަރަށް ބޮޑު އުފަލެކެވެ. އަދި މިއީ އޭނަ އަކީ ހާއްސަ ކުއްޖެއްކަން ދައްކުވައިދޭ ކަމެއް ކަމަށް ބުންޏެވެ.
އެރިކް ކިޔައިދިން ގޮތުގައި އޭނަގެ އަތްތިލަ އާއި ފައިތިލަ އެހެން ކުދިންނާ އަޅާބަލާ އިރު، އާދަޔާހިލާފަށް ބޮޑުކަން ފާހަގަވާން ފެށީ ޔޭކޭޖީގައި ކިޔަވަން ފެށި އިރު އެވެ. އަދި ބޮޑުވަމުން އައި ވަރަކަށް އަތްތިލަ އާއި ފައިތިލަ ބޮޑުވަމުންދާކަން ފާހަގަކުރެވި، ހެޔޮވަރު ބޫޓާއި އަންގި ވެސް ހޯދުމަކީ ދަތި ކަމަކަށް ވަމުން ދިޔަ ކަމަށް ބުންޏެވެ.
ނަމަވެސް މިކަމަކީ ޗެލެންޖެއްގެ ގޮތުގައި ނުދެކޭ ކަމަށާއި އެހެން މީހުން އޭނައާ ދޭތެރޭ މާ ތަފާތު ނަޒަރަކުން ނުދެކޭ ކަަމަށް ވެސް އެރިކް ބުންޏެވެ. އެހެންވެ އާއިލާގެ މީހުންނާއި ރައްޓެހިންނާ އެކީ "ނޯމަލްކޮށް" އުޅުމުގެ ފުރުސަތު އަބަދު ވެސް އޮންނަ ކަމަށް ބުންޏެވެ.