ޑާކް ރެއިން އެންޓަޓައިންމަންޓުން ސުޕަހީރޯ ފިލްމެއް ހަދަން ނިންމައިފި އެވެ.
އެ ސްޓޫޑިއޯ އިން މިކަން ހާމަކުރީ 18 ވަނަ އަހަރީ ދުވަހާ ގުޅުވައިގެން މިއަދު އިއުލާންކުރި ޕްރޮޖެކްތަކާ އެކީގަ އެވެ. ޑާކް ރެއިނުން ބުނީ އަދި ނަން ފައިނަލް ނުކުރާ ސުޕަހީރޯ ފިލްމު ޑައިރެކްޓްކުރާނީ ވިޝާލް ޒަކީ ކަމަށާއި ފިލްމު އަންނަ އަހަރު ގެނެސްދޭނެ ކަމަށެވެ.
ނަމަވެސް މިއާ ބެހޭ އިތުރު ތަފުސީލުތަކެއް އަދި ހާމައެއް ނުކުރެ އެވެ.
ވިޝާލް އަކީ މިދިޔަ އަހަރުގެ ކޮމެޑީ ފިލްމު "ވަނާޖުބޭސާ" ގެނެސްދިން ޑައިރެކްޓަރެވެ.
ރާއްޖޭގެ މިހާރުގެ އެންމެ ކާމިޔާބު އަދި ބިޒީ ސްޓޫޑިއޯ އިން މުޅިން އަލަށް ސުޕަހީރޯ ފިލްމެއް ހަދަން ނިންމި އިރު، މިހާތަނަށް މި ޖޯންރާގެ ދިވެހި ފިލްމެއް އަދި ބެލުންތެރިންނާ ހަމައަށް އައިސްފައެއް ނެތެވެ. އެހެންވެ ދިވެހި ސިނަމާ އިން ސުޕަހީރޯ ފިލްމެއް ފެނުމަކީ ދިވެހި ފިލްމުތަކަށް ލޯބިކުރާ މީހުންނަށް ވަރަށް ތަފާތު ތަޖުރިބާއަކަށްވާނެ އެވެ.
އަންނަ މަހު ހޮރޯ-ކޮމެޑީ "ބިބީ" ގެނެސްދޭން ތައްޔާރުވަމުން އަންނަ ޑާކް ރެއިނުން އަންނަ އަހަރު ގެނެސްދޭން ނިންމާފައިވާ ޕްރޮޖެކްޓްތަކުގެ ތެރޭގައި "ޕްރޮޖެކްޓް 37" އާއި "ބަޅިނދު" އާއި "މަންމަ" އަދި މި އަހަރުގެ މާޗްގައި ގެނެސްދިން "ފުރޭތަ" ޓްރޮލޮޖީގަައި ހިމެނޭ ދެވަނަ ބަައި "ލޭ" ހިމެނެ އެވެ.