ދަތުރު ގޮސް އުޅުނިކޮށް ގެއްލުނު ކ. މާލެ، މ. އަސަރީހަނދާން، ތަސްލީމް މުހައްމަދު ހޯދުމަށް މާލޭގެ ތަންތަން ބަލާފާސްކޮށްފައިވާ ކަމަށާއި އަދި އިންޓަޕޯލްގެ ޔެލޯ ނޯޓިސްއަށް އެދިފައިވާ ކަމަށް ފުލުހުން ބުނެފިއެވެ.
25 މީހުންނާއި ދެ ކުޑަކުދިން ހިމެނޭ ގްރޫޕަކާއެކު ތަސްލީމު ކ. ހުވަފެންފުށި ދެކުނުން ހިއްކާފައި އޮންނަ، ފަސްގަނޑަށް ދަތުރުގޮސްފައިވަނީ އޮަގަސްޓް 29 ވަނަ ދުވަހުއެވެ. ތަސްލީމް ގެއްލުނު ކަމަށް ފުލުހުންނަށް ރިޕޯޓް ކޮށްފައިވަނީ 2024 އޮގަސްޓް 30 ވަނަ ދުވަހުގެ މެންދުރު 1:20 ހާއިރުއެވެ.
މި މައްސަލައިގައި ފުލުހުން މިއަދު ނެރުނު ބަޔާނެއްގައި ބުނެފައިވަނީ ތަސްލީމް ގެއްލުނު ކަމުގެ ރިޕޯޓް ލިބުމުން، ފުލުހުންގެ މެރިން ޕޮލިސް އަދި އެމްއެންޑީއެފްގެ ކޯސްޓްގާޑަށް މައުލޫމާތު ހިއްސާކޮށްފައިވާ ކަމަށެވެ. އަދި ތަސްލީމް ހޯދުމުގެ މަސައްކަތުގައި އެމްއެންޑީއެފްގެ ޑައިވިން ޓީމް އޮގަސްޓް 31، ސެޕްޓެންބަރު 1 އަދި ސެޕްޓެމްބަރު 6 ވަނަ ދުވަހު ޖުމުލަ 943،998 އަކަމީޓަރުގެ ސަރަހައްދެއް ޑައިވްކޮށްގެން ބަލާފައިވާ ކަމަށެވެ.
ފުލުހުން ބުނެފައިވަނީ ތަސްލީމު އާއެކު ދަތުރުދިޔަ ގްރޫޕު އެފަސްގަނޑަށް ދަތުރުދިޔައިރު އެފަސްގަނޑުގައި އިތުރު ބަޔަކު ދަތުރުގޮސްތިބި ކަމަށެވެ. އޮގަސްޓް 30 ވަނަ ދުވަހު ހެނދުނު ތަސްލީމް، ދަތުރުގެ ބައިވެރިންނާއެކު ހަރަކާތްތެރިވާ މަންޒަރު ހިމެނޭ ފޮޓީ އަދި ވީޑިއޯ ތަހުގީގަށް ލިބިފައިވާ ކަމަށް ފުލުހުން ބުނެފައިވެއެވެ. އަދި ފަސްގަނޑުގައި ތަސްލީމު ހުއްޓާ އެންމެފަހުން ފެނިފައިވަނީ އެދުވަހުގެ 07:00 އާއި 09:00 އާއި ދޭތެރޭގައި ކަމަށްވެސް ތަހުގީގަށް ލިބިފައިވާ މައުލޫމާތުން އެނގޭކަމަށް ފުލުހުން ބުނެފައިވެއެވެ.
ތަސްލީމު މާލެ ދާންބޭނުންވާ ވާހަކަ ބުނެފައިވުމުން އެދުވަހުގެ 10:00 އާއި 11:00 އާ ދޭތެރޭ މާލެ ފުރި ލޯންޗުގައި ތަސްލީމް މާލެ ފޮނުވާލުމަށް ދަތުރުގެ ބައިވެރިން އޭނާ ހޯދުމުން ފެނިފައި ނުވާކަމަށާއި އަދި އޭނާ އެހެން ލޯންޗެއްގައި މާލެ ގޮސްފައިވޭތޯ ބެލުމަށް ދަތުރުގެ ބައިވެރިން ތަސްލީމުގެ އާއިލާއަށް ގުޅައި މައުލޫމާތު ސާފުކޮށްފައިވާ ކަމަށް ފުލުހުން މައުލޫމާތު ދީފައިވެއެވެ. އަދި ތަސްލީމް މާލެ ނާންނަކަމަށް އާއިލާއިން މައުލޫމާތު ދިނުމުން އޭނާ ހޯދުމުގެ މަސައްކަތް ދަތުރުގެ ބައިވެރިން ފެށިކަމަށްވެސް ފުލުހުން ބުނެފައިވެއެވެ.
ފުލުހުން ބުނެފައިވަނީ މި މައްސަލައިގެ ތަހުގީގަށް ތަސްލީމާއެކު ދަތުރުދިޔަ މީހުންނާއި ސުވާލުކޮށްފައިވާ ކަމަށާއި އަދި އެފަސްގަނޑަށް ދަތުރުގޮސް އުޅުނު އިތުރު ގްރޫޕެއްގައި ހިމެނޭ 12 މީހުންނާވެސް ސުވާލުކޮށްފައިވާ ކަމަށެވެ.
"އަދި ތަސްލީމު މުހައްމަދު ބޭނުންކުރާ ފޯނާއި ލެޕްޓޮޕް ފޮރެންސިކް ތަހުލީލު ކުރުމުގެ މަސައްކަތް ފަށައި، ތަސްލީމް މުހައްމަދު އާއި އިތުރު ބަޔަކު ދަތުރު ދިއުމަށް ބޭނުންކުރި ދެ ލޯންޗު ބަލައިފާސްކޮށްފައިވެއެވެ. މީގެއިތުރުން، ތަސްލީމް މުހައްމަދު މާލޭގައި އާންމުކޮށް ގޮސްއުޅޭ ސަރަހައްދުތައް ބަލައިފާސްކޮށްފައިވާއިރު، ތަސްލީމް މުހައްމަދު ހޯދުމަށްޓަކައި އިންޓަޕޯލް ޔެލޯ ނޯޓިސްއަށް ވަނީ އެދިފައެވެ." ފުލުހުން ބުނެފައިވެއެވެ.
ފުލުހުން ބުނެފައިވަނީ މި މައްސަލައާ ގުޅިގެން ތަސްލީމްގެ އާއިލާއާ ފުލުހުން ބައްދަލުކޮށް މައުލޫމާތު ސާފު ކޮށްފައިވާކަމަށާއި އަދި ތަހުގީގު ކުރިއަށްދާގޮތުގެ މައުލޫމާތުވެސް ހިއްސާ ކޮށްފައިވާކަމަށެވެ.
އިންޓަޕޯލްގެ ޔެލޯ ނޯޓިސްއަކީ ގެއްލިގެން ހޯދާ މީހުން ހޯދުމުގެ އެހީތެރިކަމަށް އެދި ނެރޭ ނޯޓިހެކެވެ. މީގެކުރިން ރާއްޖެއިން އިންޓަޕޯލްގެ ޔެލޯ ނޯޓިސް ނެރެފައިވަނީ ގެއްލިގެން ހޯދަމުންދިޔަ ނޫސްވެރިޔާ އަހުމަދު ރިލްވާން އަބްދުﷲ ހޯދުމަށެވެ.