މާރަންދޫ ކައުންސިލުގެ ހުސްވެފައިވާ ގޮނޑިއަށް މެންބަރަކު ހޮވަން މިއަދު ބޭއްވި ބައި-އިލެކްޝަން ސަރުކާރު ހިންގާ މައި ޕާޓީ ޕީއެންސީގެ މެންބަރު އަބްދުލްހަމީދު އަބްދުލްސައްތާރު ކާމިޔާބުކުރައްވައިފި އެވެ.
މިއަދު ބޭއްވި ބައި-އިލެކްޝަން ޕީއެންސީގެ ކެންޑިޑޭޓު ކާމިޔާބުކުރެއްވީ 285 ވޯޓު ހޯދައިގެންނެވެ. އޭނާއާ ވާދަކުރެއްވި އިދިކޮޅު އެމްޑީޕީގެ ކެންޑިޑޭޓް ޝިހާމް މުހައްމަދަށް ލިބުނީ 250 ވޯޓެވެ.
މާރަންދޫ ކައުންސިލްގެ ބައި-އިލެކްޝަނުގައި ޖުމުލަ 736 މީހުންނަށް ވޯޓުލެވޭ އިރު ވޯޓުލައިފައި ވަނީ 560 މީހުންނެވެ. އޭގެތެރެއިން 25 ވޯޓަކީ ބާތިލު ވޯޓެވެ.
މި ބައި-އިލެކްޝަން ބާއްވާފައިވަނީ މާރަންދޫ ކައުންސިލްގެ ނައިބު ރައީސްކަމުގެ މަގާމުގައި ހުންނެވި އަހުމަދު ރަމީޒު މިދިޔަ ޖުލައިގައި ކުއްލި ގޮތަކަށް ނިޔާވުމާ ގުޅިގެންނެވެ.