ޗައިނާގައި ކުރިއަށްދާ ވޮލީބޯޅަ ކޯޗިން ކޯހުގެ ސަބަބުން ރާއްޖޭގެ އެކި ހިސާބުތަކުގެ ވޮލީބޯޅަ އަށް ރަނގަޅު ކުރިއެރުމެއް އަންނާނެ ކަމުގެ އުންމީދު ބޮޑު ކަމަށް ސްޕޯޓްސް މިނިސްޓަރު ޢަބްދުﷲ ރާފިޢު ވިދާޅުވެއްޖެ އެވެ.
މާދަމާ އިން ފެށިގެން ޗައިނާގެ ހަންޒޫގައި ކުރިއަށް ގެންދަން ހަމަޖެހިފައިވާ ކޯޗިން ޕްރޮގްރާމްގައި ބައިވެރިވާ 20 ބައިވެރިންނާ އެކީ މިއަދު ބޭއްވި ބައްދަލުވުމުގައި މިނިސްޓަރު ވިދާޅުވީ ކޯހަށް ފަހު އެނބުރި ރާއްޖެ އައިސް ކޯޗުން ރާއްޖޭގެ ވޮލީބޯޅަ ކުރިއެރުވުމަށް މަސައްކަތްކޮށް ދޭނެ ކަމަށް އުންމީދު ވެސް ކުރައްވާ ކަމަށެވެ.
މި ކޯޗިން ތަމްރީން ޕްރޮގްރާމްގެ ބައިވެރިންގެ ތެރޭގައި އައްޑޫ ފޭދު އާއި ހިތަދޫ، ބ. ގޮއިދޫ، ކ. ހުރާ، ކ. މާލެ، އދ. މަހިބަދޫ، ހދ. ހަނިމާދޫ ހއ. އިހަވަންދޫ، ހދ. ނޮޅިވަރަމް، ފ. ފީއަލި، ޅ. ނައިފަރު އަދި ހއ. ހޯރަފުށި، ވ. ފެލިދޫ، ރ. މީދޫ އަދި އއ. ބޮޑުފުޅަދޫ އަށް ނިސްބަތްވާ ބައިވެރިން ހިމެނެ އެވެ.
މި ކޯޗިން ކޯސް ކުރިއަށް ދާނީ މާދަމާ އިން ން ފެށިގެން އަންނަ މަހުގެ 5 އާ ހަމައަށެވެ.
ކޯހުގެ ބައިވެރިންނާ ބައްދަލުކުރައްވައި ރާއްޖޭގައި ހުންނަވާ ޗައިނާ ސަފީރު ވިދާޅުވީ ރާއްޖޭގައި ވޮލީބޯޅަ ފޯރި ވަރަށް ބޮޑަށް އެބައޮތް ކަމަށާއި، މި ތަމްރީން ޕްރޮގްރާމަކީ ވޮލީބޯޅަ އިތުރަށް ފުޅާކުރަންވެވޭ އެހީތެރިކަމެއް ކަމަށެވެ.