ޑާކް ރެއިން އެންޓަޓައިންމަންޓުން މީގެ 8 އަހަރު ކުރިން އިއުލާންކުރި ފިލްމު "މަންމަ" ވާނުވާގައި ބޭއްވުމަށް ބޭއްވުމަށް ފަހު، އެ ފިލްމު އަންނަ އަހަރު ބެލުންތެރިންނަށް ގެނެސްދޭނެކަން މިއަދު އިއުލާންކޮށްފި އެވެ.
މިކަން ހާމަކުރީ އެ ސްޓޫޑިއޯ އަށް މިއަދަށް 18 އަހަރު ފުރުމާ ދިމާކޮށް އިއުލާންކުރި ޕްރޮޖެކްޓްތަކުގެ ތެރޭގަ އެވެ.
އަންނަ އަހަރު "މަންމަ" ގެނެސްދޭން ނިންމި ނަމަވެސް ފިލްމު އަޅުވާނެ ތާރިހަކާއި މީގެ ކާސްޓާ ބެހޭ އެއްވެސް މައުލޫމާތެއް އަދި ނުދެ އެވެ. އެކަމަކު މިއީ ޕްރޮޑިއުސަރު މުހައްމަދު އަލީ (މޮގާ) ގެ އަންހެނުން އައިޝަތު ފުއާދު (ލޮކީ) ގެ ތައުފީގުގެ ސްކްރީންޕްލޭއަކަށް ހަދާ ފިލްމެއްކަން ޑާކް ރެއިނުން ވަނީ ކަށަަވަރުކޮށް ދީފަ އެވެ.
ލޮކީ މީގެ ކުރިން ވެސް ޑާކް ރެއިންގެ ބައެއް ފިލްމުތަކުގެ ސްކްރީންޕްލޭގައި ވެސް ހިއްސާވެފައިވެ އެވެ. އޭގެ ތެރޭގައި މިދިޔަ އަހަރުގެ "ނޮވެމްބާ" އާއި 2019 ގެ "މާމުއި" އަދި 2017 "މީ ލޯތްބަކީ" ހިމެނެ އެވެ. އަދި އެ ސްޓޫޑިއޯގެ 2014 ގެ "ޙުޅުދާން" އަކީ ލޮކީ ލިޔެ، ޑައިރެކްޓްކުރި ފިލްމެކެވެ. މީގެ އިތުރުން 2018 ގެ "ވަކިން ލޯބި" އަކީ ސީދާ ލޮކީގެ ސްކްރީންޕްލޭއަަށް ހެދި ފިލްމެކެވެ.
"މަންމަ" ޑައިރެކްޓްކުރަން ހަމަޖެހިފައި ވަނީ ޑާކް ރެއިންގެ ގިނަ ފިލްމުތަކެއް ޑައިރެކްޓްކޮށް، އެވޯޑް ވެސް ހޯދާފައިވާ އަލީ ޝިފާއު ޗިއްޕެ) އެވެ.
މި ފިލްމު ބެލުންތެރިން ގެނެސްދޭން އެ ސްޓޫޑިއޯ އިން އަލުން ނިންމި އިިރު، 2016 ގައި "މަންމަ" އިއުލާންކުރި އިރު، ފިލްމުގެ ކާސްޓްގައި ހިމެނޭނެ ކަމަށް ބުނީ މަޝްހޫރު ތަރިން ކަމަށްވާ ޔޫސުފް ޝަފީއު (ޔޫއްޕެ) އާއި ކުރީގެ ބަތަލާ ނިއުމާ މުހައްމަދެވެ. ނަމަވެސް ނިއުމާ މިހާރު ފިލްމު ކުޅުން ހުއްޓާލާފައިވުމާއި ވަރަށް ގިނަ ދުވަސްތަކެއް ފަހުން "މަންމަ" ގެ މަސައްކަތް ފަށާތީ އަންނަ އަހަރު ފިލްމު ގެނެސްދޭނީ މުޅިން ތަފާތު ކާސްޓަކާ އެކީ ކަމަށް ބެލެވެ އެވެ.