ދީނީ އިޖްތިމާއީ މަސައްކަތްކުރާ ޖަމިއްޔާތަކުގެ އަހަރީ ބައްދަލުވުން ފަށައިފިއެވެ.
މި ބައްދަލުވުން ފަށާފައިވަނީ މިއަދު ހެނދުނު އިސްލާމީ މަރުކަޒުގެ ޖަލްސާކުރާ މާލަމުގައެވެ.
މި ބައްދަލުވުމުގައި 70 ޖަމިއްޔާއަކުން ބައިވެރިވެފައިވެއެވެ. އިސްލާމިކް މިނިސްޓްރީން ބުނެފައިވަނީ މި މަހާސިންތާގައި ޖުމްލަ 98 ފަރާތަކުން ބައިވެރިވާ ކަމަށެވެ. މި މަހާސިންތާގައި ހާޒިރުވެގެން ބައިވެރިވާ ފަރާތްތަކުގެ އިތުރުން އޮންލައިންކޮށްވެސް ބައިވެރިވާ ފަރާތްތައް ހިމެނޭ ކަމަށް މައުލޫމާތު ދީފައިވެއެވެ.
މި ބައްދަލުވުން ކުރިއަށް ގެންދިއުމަށް ހަމަޖެހިފައިވަނީ 3 ސެޝަނަކަށް ބަހާލައިގެންނެވެ.
ދީނީ ޖަމިއްޔާތަކުގެ އަހަރީ ބައްދަލުވުމަކީ ދިވެހިރާއްޖޭގައި އިސްލާމީ ދައުވަތު ފަތުރާ ދައުވަތުގެ މައިދާނުގައި ހަރަކާތްތެރިވާ ޖަމިއްޔާތަކާއި އިސްލާމީ ކަންތައްތަކާ ބެހޭ ވުޒާރާ ގުޅިގެން ދަޢުވާގެ ކަންކަން ކުރިއަށް ގެންދެވިދާނެ ގޮތްތަކާއި، އެ ފަރާތްތަކުގެ ހިޔާލު ހޯދުމަށް ބޭއްވޭ ބައްދަލުވުމެކެވެ. މި ބައްދަލުވުމުގެ ތެރެއިން ރާއްޖޭގެ ދަޢުވަތުގެ މައިދާނުގައި ހަރަކާތްތެރިވާ ބައެއް ބޮޑެތި ޖަމިއްޔާތަކުގެ މަސައްކަތްތައް ކުރިއަށްދާ ގޮތް ހިއްސާކުރުމާއި، ޖަމިއްޔާތަކުން ދަޢުވަތުގެ ކަންކަމުގައި ޚިޔާލު ހުށައެޅުމުގެ ފުރުސަތުވެސް ލިބިގެންދާނެއެވެ.