"ގިސް" ގެ ނަމުގައި ވެބް ސީރީޒެއް ގެނެސްދޭން ޑާކް ރެއިން އެންޓަޓައިންމަންޓުން ތައްޔާރުވާން ފަށައިފި އެވެ.
އިއްޔެ ފާހަގަކުރި އެ ސްޓޫޑިއޯގެ 18 ވަނަ އަހަރީ ދުވަހާ ގުޅުވައިގެން އިއުލާންކުރި ޕްރޮޖެކްޓްތަކުގެ ތެރޭގައި ހިމެނޭ މި ސީރީޒަކީ މީޑިއާނެޓާ ގުޅިގެން ހަދަން ނިންމާފައިވާ އެއްޗެއް ކަމަށް ޕްރޮޑިއުސަރު މުހައްމަދު އަލީ (މޮގާ) ބުންޏެވެ.
އޭނަ ބުނީ "ގިސް" އަކީ ޑާކް ރެއިނުން އަންނަ މަހުގެ 7 ގައި އޮލިމްޕަހަށް ގެންނަން ތައްޔާރުވަމުން އަންނަ ފިލްމު "ބިބީ" ގެ ޑައިރެކްޓަރު ޝަހުދާ މަހުމޫދުގެ ސްކްރީންޕްލޭއަކަށް އަލީ ޝިފާއު (ޗިއްޕެ) ޑައިރެކްޓްކުރަން ހަމަޖެހިފައިވާ ސީރީޒެއް ކަމަށެވެ. މޮގާ ބުނީ މީގެ ކާސްޓް ވަރަށް އަވަހަށް ފައިނަލްކޮށް ޝޫޓިން ފަށާނެ އެވެ.
އަދި ޑިސެމްބަރު މަހުގެ ތެރޭގައި މީޑިއާނެޓް މެދުވެރިކޮށް "ގިސް" ބެލުންތެރިންނާ ހަމައަށް އަންނާނެ ކަމަށް ވެސް ބުންޏެވެ.
ކުރިން ވެސް ޑާކް ރެއިނުން މީޑިއާނެޓަށް މަގުބޫލު ސީރީޒެއް ގެނެސްދީފައިވެ އެވެ. އެއީ 15 އެޕިސޯޑާ އެކީ 2021 ގައި ގެނެސްދިން "ރޫމިއާ ޖަންނަތު" އެވެ. އަދި އެ ސްޓޫޑިއޯގެ މިދިޔަ އަހަރު ފިލްމު "ހިނދުކޮޅެއް" އަކީ ސިނަމާ އަށް ނުގެނެސް ސީދާ މީޑިއާނެޓްގައި ޕްރީމިއާކުރި ފިލްމެކެވެ.
ޑާކް ރެއިނުން ބައިސްކޯފަށް ވެސް ވަރަށް މަގުބޫލު ސީރީޒެއް 2021 ގައި ގެނެސްދިނެވެ. އެއީ 20 އެޕިސޯޑްގެ "ގިރިޓީ ލޯބި" އެވެ.