ސ. ހިތަދޫގައި ފަގީރުންނަށް ބެހި ކަދުރު، ހިތަދޫ ކޯޓުގެ މެޖިސްޓްރޭޓް ، އިބްރާހިމް ނަފީސްގެ ގެއަށް ދޫކޮށްފައި ނުވާތީ ކޯޓަށް އޭނާ ހުށަހެޅުއްވި މައްސަލަ އަނބުރާ ގެންގޮސްފި އެވެ.
އައްޑޫ ސިޓީ ކައުންސިލްގެ މައްޗަށް ހިތަދޫ ކޯޓުގައި ނަފީސް ކުރެއްވި އެ ދައުވާގައި ބުނެފައިވަނީ ނަފީސްގެ ގެ ކޮންގްރެސް އާއި އޭނާގެ ބެލުމުގެ ދަށުގައި ހުންނަ ޕޮލިރިސްގޭގެ އިތުރުން ހިއުމަންގެއަށް ކަދުރު ބަލައި ސޓީ ކައުންސިލަށް ދިއުމުން، ކަދުރު ދޫކޮށްފައި ނުވާ ކަމަށެވެ.
ކަދުރު ދޫކޮށްފައި ވަނީ ޒަކާތް ލިބިގަތުމަށް ނަން ނޯޓުކޮށްފައި ތިބި މީހުންނަށް އެކަނި ކަމަށް އައްޑޫ ސިޓީ ކައުންސިލުން ބުނި ނަމަވެސް އޭގެ ސަބަބުން ނަފީސްގެ ހައްގުތައް ގެއްލިގެންދާ ކަމަށް އެ ދައުވާގައި ވަނީ ބުނެފަ އެވެ.
ނަމަވެސް ސިޓީ ކައުންސިލްގެ އޮފިޝަލަކު ވިދާޅުވީ ސައޫދީ ސަރުކާރުން ބެހުމަށް އެ ކައުންސިލަށް ދޫކޮށްފައިވާ މިންވަރަށް ބަލާއިރު، އެ ބެހީ ފަގީރުންގެ ލިސްޓްގައި ނަން ނޯޓްކޮށްފައިވާ މީހުންގެ ގެތަކަށް އެކަނި ކަމަށެވެ.
.
އެ މައްސަލަ އަނބުރާ ގެންގޮސްފައިވާކަން އައްޑޫ ސިޓީ ކައުންސިލަށް އިއްޔެ ވަނީ އަންގައިފަ އެވެ. އައްޑޫ ސިޓީ ކައުންސިލާ ދެކޮޅަށް ގާޒީ ނަފީސް މައްސަލައެއް ހުށަހަޅުއްވި އިރު އޭނާ ގެންދަވަނީ އެ ކައުންސިލާ ދެކޮޅަށް ހުށަހެޅިފައިވާ ގިނަ މައްސަލަތަކެއް މިހާރު ވެސް ބައްލަވަމުން ކަން ފާހަގަކޮށްލެވެއެވެ.